En HTC andan para presentar un novo terminal que faga de buque insignia, ao que inicialmente coñecemos como HTC M7, pero que segundo parece podería continuar a liña da serie One. Chame o que se chame, o que si é certo é que vai ser presentado nun evento en New York o vindeiro 19 de febreiro.
Dos datos que se foron filtando destaca sobre todo a súa cámara, que conta cun novo sensor de ultrapíxeles, cuxo modo de funcionamento é a través de 3 capas de sensores de 4,3 megapíxeles, cada un deles centrado nunha canle de cor que logo se combinan facendo unha imaxe que suma 12,9 megapíxeles.
O resto de características van na liña do que é a definición de gama alta no panorama Android de hoxe en día: pantalla grande (4,7 polgadas a 1080p), procesador de catro núcleos a 1,7 GHz, 2 GB de memoria RAM e 32 GB de memoria interna.
Para ir abrindo boca, desde HTC fixeron públicos 5 vídeos teaser de 4-5 segundos cada un, nos que se poden ver algunhas das liñas.
En canto a dispoñibilidade e prezos está prevista a súa chegada ás tendas para o mes de marzo, cun prezo que rondará os 650 euros.