Desde hai anos, Apple e Samsung están involucrados nunha estúpida guerra de patentes iniciada por Steve Jobs, quen quería destruír Android custase o que lle custase. Unha vez máis, un xuíz americano volve situarse do lado da empresa patria, sentenciando unha multa de 119 millóns de dólares, cifra que, de todos os xeitos, é bastante inferior á que pedía a empresa de Cupertino, 2200 millóns.
As patentes infrinxidas por Samsung son a 5.946.647 (ligazóns rápidas), 8.046.721 (deslizar para desbloquear a pantalla) e 8.074.172 (suxerencias de pantalla), todas elas cuestións básicas e obvias en todos os sistemas operativos e trebellos, con amparo de patente por un sistema, o americano, bastante polémico. Chama a atención que, neste senso, Apple só loite contra Samsung, mais a explicación é tan sinxela como ver as cifras de venda, xa que Samsung é o único que non só é capaz de facerlles fronte, senón de superalos en ducias de millóns de dispositivos vendidos.
Con este veredito, Samsung suma un total de 1049 millóns de dólares en concepto de danos e prexuízos a Apple (930 millóns nun primeiro xuízo e 119 neste último). Acabará por fin esta telenovela?
En cuestión de trebellos, xa se sabe: se non podes co teu enimigo, denúnciao á oficina de patentes.
