Esta mesma mañá comentabamos as novidades de Swarm, a aplicación xurdida logo de que Foursquare decidira partir en dúas a súa aplicación. Tamén adiantabamos que axiña saberíamos máis do prometido renovado Foursquare, cuxos detalles veñen de ser dados a coñecer nun medio americano.
O primeiro que cambia é o logo da aplicación, que se convirte nun gran F sobre unha especie de mapa, mais onde vén o prato forte é no punto das recomendacións. E é que o novo Foursquare personalizará a experiencia de casa usuario, atendendo aos nosos gustos (aínda que practicamente só centrado nas comidas) para ofrecernos información do que hai ao noso arredor que nos poida interesar. Tamén achegarán un apartado co “máis importante do mes” para que descubramos novos lugares. Iso si, todo sen darlle importancia aos checkins.
Isto último chama a atención, pois Swarm, que ten unha das puntuacións máis baixas da Play Store, está a rexistrar máis checkins que nunca, en palabras da propia compañía, nun momento no que ademais a xente os está a abandonar. Eles seguen nas súas trece de que ter dúas aplicacións, unha para recomendacións e outra para checkins, é mellor ca unha única. En calquera caso, as páxinas dos diferentes venues manterán un botón de acceso directo ao checkin en Swarm, para os usuarios máis nostálxicos do Foursquare orixinal.
Coas novidades dadas a coñecer tamén sabemos que haberá dúas listaxes de amigos, os de Swarm, cos que compartimos a localización, e os de Foursquare, que permitirá seguir xente que nos poida interesar polos seus gustos.
O lanzamento desta nova aplicación está previsto para dentro “dunhas semanas”. Que vos parecen os cambios? Son abondos ou non mellora moito o que xa había?
Non teño dúbida: vou desinstalar as dúas e agora farei checkins con un tuit, mentras non apareza outro servizo semellante.
Ata agora usaba o 4SQ para informar ás miñas amistades de Facebook e Twitter dos sitios por onde andaba. Á inmensa maioría desas persoas non lles interesa o 4SQ, polo que enfatizar o carácter social da aplicación para min carece de valor. Tampouco me serven de nada as posibles recomendacións de coñecidos, pois habitualmente son o primeiro en ir aos sitios. As poucas veces que tentei buscar un restaurante ou semellante foi un suplicio; é mais rápido e útil visitar TripAdvisor.