A data vaise achegando. Tal e como está previsto, en outono chegará a moi agardada versión 5.0 de Android, da que xa puidemos ver un adianto durante o Google I/O deste ano. Porén, o que non desvelaron daquela foi o nome que levará, máis aló da correspondente inicial “Android L” (xa sabedes que van por orde cronolóxica).
Mais os larpeiros de Google xogan sempre con postres para nomear as versións de Android e aínda que soaban Limon Pie e Lollipop – Licorca e Larpeira non estaban nos plans 😉 – un último rumor apunta a que podería ser Lion, repetindo nome patrocinado con Nestlé tras o éxito da campaña de marketing co KitKat.
Supostamente isto é o que aparece nun benchmark do Nexus 5, un terminal que segundo parece podería ter unha pantalla de 5,2 polgadas e resolución QHD (1440 x 2560 píxeles), procesador SnapDragon 805 a 2,7 GHz, 3 GB de memoria RAM, 32 GB de memoria interna e cámaras de 12 e 2 megapíxeles.
Será o Nexus 5 con Android L o voso próximo terminal?
