Vodafone vén de preanunciar algunha das novidades que levará ao Mobile World Congress este ano, unha cita na que darán a coñecer novas tecnoloxías que facilitarán o despregamento da rede e mellorarán a experiencia das usuarias dos seus servizos. Falamos de LTE-U, Crowd RAN e DSL/4G.
O LTE-U, ou LTE Unlicensed, permite empregar a banda de frecuencias de 5 GHz, a mesma que usan as redes WiFi, de tal xeito que se pode mellorar a velocidade da rede até os 600 Mbps de descarga, segundo as probas levadas a cabo por Vodafone. Ademais, escolle en cada momento a canle menos conxestionada, o que fai que poida convivir sen maiores inconvintes coas redes WiFi das clientas.
A seguinte novidade que Vodafone levará ao MWC é o Crowd RAN, un método para abaratar e acelerar o despregamento das redes 4G, aumentando o cobertura grazas a múltiples puntos de acceso 4G compartidos en forma de minicélulas que só precisan conectarse á rede eléctrica para funcionar.
Finalmente, Vodafone anuncia novidades na tecnoloxía bounding DSL/4G, unha combinación das redes DSL tradicionais e o 4G para evitar que haxa interrupcións de servizo, ademais de sumar velocidades de conexión. O sistema é capaz de separar a nível de rede o tráfico entre 4G e DSL para que, de xeito transparente, sempre haxa rede aínda que caia un ou outro servizo; funcionando correctamente as usuarias poderán gozar das máximas velocidades, polo que pode ser unha solución para o rural galego.
Vodafone ten en marcha unha forte aposta polo 4G en todo o estado, tendo xa despregados máis de 6000 nodos cos que chega a 882 concellos (todas as cidades de máis de 70.000 habitantes, todas as capitais de provincia, zonas turísticas, 12 aeroportos, 7 estacións de trens, 32 espazos para eventos multitudinairos, 20 estadios de fútbol (incluídos Riazor e Balaídos) e pistas de esquí.
Ademais desde setembro ofrece 4G+ (LTE-A), que permite acadar velocidades de descarga por riba dos 300 Mbps, en A Coruña, Madrid, Barcelona, Valencia, Sevilla, Bilbao, Málaga e Zaragoza.