Tras o fracaso de Facebook Home, o launcher baseado en Facebook para Android, a compañía da rede social botou tempo centrándose unicamente na aplicación principal e en Messenger, adicada á comunicación e unha das ferramentas de mensaxería instantánea máis empregadas.
Agora pretende ir un paso máis aló coa súa nova aplicación, Hello, un marcador de teléfono que aspiran a que empreguemos en sustitución do principal, facebookeando as nosas comunicacións e facilitando as cousas á hora de facer chamadas gratuítas baixo a rede WiFi. Tamén se integra bastante ben con Messenger, de tal xeito que se perdemos unha chamada poderemos mandar unha mensaxe gratuíta con esta segunda aplicación.
Tres son as principais opcións que permite Hello. A primeira delas é a autentificación da persoa chamante, ofrecéndonos información de quen é dacordo ao contido da rede social e dando outros datos de “utilidade”, como avisando de que está de cumpreanos, por exemplo. Doutra banda, permite bloquear chamadas de números que non desexamos e acceder a información de locais facilmente desde o buscador.
Hello é unha aplicación gratuíta que xa está dispoñíbel na Play Store, aínda que polo de agora con limitación xeográfica.
[Actualización] Instala xa Hello manualmente co ficheiro apk dispoñíbel nesta ligazón.
