Chegou o día. Microsoft lanza hoxe Windows 10, a versión máis ambiciosa do seu sistema operativo estrela, co que, máis aló das novidades máis técnicas, inauguran un novo tempo para a compañía, cunha filosofía máis aberta da que xa fomos vendo outras chiscadelas, como ofrecer de balde Office para Android.
Gradualmente, millóns de ordenadores de todo o mundo con Windows 7, Windows 8 e Windows 8.1 irán recibindo a actualización a Windows 10, que será gratuíta durante o primeiro ano, sempre e cando se dispoña dunha licenza válida. Así a todo, quenes non tiveran unha licenza válida pero foran betatesters do programa Windows Insider tamén verán actualizado Windows 10 á versión final e legal.
Para todos os demais casos, existen un total de 7 edicións diferentes de Windows 10 que poder elixir:
- Windows 10 Home. A estándar que virá preinstalada na meirande parte dos ordenadores que podemos mercar nas tendas. Virá co navegador Microsoft Edge preinstalado.
- Windows 10 Pro. A versión Pro de Windwos, con opcións de conexión a servidores e acceso ao programa Windows Update for Business.
- Windows 10 Mobile. sucesor de Windows Phone e orientado ao smarphone. Conta con versións de Office adaptadas a entornos táctiles e Continuum for Phones, que permite convertir o teléfono nun PC cando se conecta a un monitor, rato e teclado.
- Windows 10 Mobile Enterprise. semellante á anterior, pero orientado a empresas, con licenzas especiais.
- Windows 10 Enterprise. Semellante á Pro, pero destinada a grandes corporacións
- Windows 10 Education. Semellante á Enterprise, pero orientada a institucións educativas e académicas.
- Windows 10 IoT Core. Edición limitada, pensada para dispositivos de baixo custe.
Se pretendemos actualizar o noso ordenador á nova versión debemos ter en conta que os requisitos mínimos son un procesador SoC de 1 GHz, 1 GB de memoria RAM (versión 32 bits) ou 2 GB (versión 64 bits), tarxeta gráfica DirectX 9 ou superior con controlador WDDM 1.0 e unha resolución de pantalla de 1024 x 600 píxeles.
Se o noso dispositivo cumpre coas especificacións requeridas e estamos en condicións de actualizar, o mellor é que antes de aceptar a actualización cando nos salte fagamos unha copia de seguridade dos nosos datos importantes, pois aínda que non debera pasarlles nada, debemos ser precavidos.
Así mesmo, tamén é fundamental termos ao día as actualizacións en Windows Update, tanto as propias de Windows como as de drivers ou programas de terceiros e desactivar temporalmente o antivirus para que non ande molestando por facer unha actualización do sistema. Deste xeito nos aseguraremos unha transición normalizada ao novo sistema operativo.
Tedes ganas de traballar co novo Windows? É cuestión de tempo que o teñades dispoñíbel no voso trebello 🙂
Hola.
Encántame que teñas un subtítulo como “O teu espazo Android en galego” e logo saques un artigo completo sobre Windows 10. Agardo que cho pagasen ben e teñades para hospedar o blog durante anos con iso. Quizais incluso para pagar unhas boas vacacións. Inda así non entendo a que ben. Non se trata de non poder tratar outros temas, pero a frase final soa case amezante e certamente é intimidante: “É cuestión de tempo que o teñades dispoñíbel no voso trebello :)”, é coma o vello chiste, “non sei se se escoita ao demo se o poño ao revés, pero se o poño ao dereito ¡instala Windows!!”
Saúde!!
Ola karlggest, antes de nada, grazas polo teu comentario.
O subtítulo fai referencia a diversas cousas, entre outras á orixe do blog, á temática principal e á liña editorial. Iso non quita que fagamos artigos doutras temáticas relacionadas co mundo tecnolóxico que consideramos de relevancia para as nosas lectoras, como poden ser tarifas, operadores, outros sistemas operativos (Ubuntu, Windows, Tizen, FirefoxOS… por citar algúns que se teñen tratado), mais como podes comprobar neste caso concreto leva unha etiqueta de ‘offtopic’.
Para ben ou para mal non nos pagaron ren polo artigo, nin en efectivo nin en vacacións. Nin foi, nin será o noso estilo. Facemos a nosa labor de xeito voluntariosa e gratuíta, sen beneficios, só por querer compartir información tecnolóxica na nosa lingua, aínda que temos un sistema de doazóns para que se algunha lectora quere facer unha aportación que nos axude cos gastos que nos supón a faga. E quen non queira doar, pode disfrutar igualmente de todo o contido de xeito gratuíto.
Sobre a frase final: Sempre tivemos un estilo desenfadado nos nosos artigos e non o imos mudar.
Saúdos 🙂