A batería dos nosos smartphones (ou máis ben a falta dela) é unha das maiores queixas das usuarias, que vemos que conforme medran o número de procesadores, memoria ou megapíxeles non o fai así a capacidade da batería e, polo tanto, a súa autonomía.
Lenovo quere pegar un golpe na mesa neste eido e anunciará no IFA 2015 o Lenovo Vibe P1, que xa foi filtrado tanto nas súas especificacións técnicas como en imaxes.
O que máis destaca do trebello é a súa batería de 5000 mAh, xa que polo demais temos un trebello de gama media bastante normaliño, con procesador SnapDragon 615 (oito núcleos, 4 x 1,7 GHz, 4 x 1,1 GHz), 3 GB de memoria RAM, dual SIM e pantalla de 5,5 polgadas con resolución FullHD 1080p. Funciona con Android 5.1 Lollipop.
Agárdase que estea dispoñíbel na China a finais de setembro por uns 300 euros ao cambio. Estaríades dispostas a pagar máis por un terminal con maior autonomía?
Teño un Jiayu G4S, que comprei porque era dos poucos que traían unha gran autonomía o ano pasado. Tiña 300mAh e da quela eran moitos para esa resolución e pantalla (720p para 4,7″), e ademáis extraíble.
Compensa esa autonomía. Ver que o teu terminal aguanta todo o día a pesar de ter o brillo case ó máximo e comparalo con un G3 que ten que ter a pantalla case apagada para chegar ó final do día… É unha comodidade.
Pero máis comodidade é poder cambiar a batería en 1 minuto e tela cargada… A ver canto tardas en cargar un terminal de 5000mAh cun cargador de 1000mAh ou de 2000mAh. No primeiro dos casos son 5h e no segundo 2,5h. Se a batería fose extraíble, sería a combinación perfecta.