As datas importantes do Entroido estanse a achegar, mais en moitas vilas do país xa se comezou a celebrar, polo que pensamos que é o momento de achegarvos unha app para seguir de primeira man o Entroido de Verín, un dos de máis sona do país. Esta ferramenta chámse Entroido Verin
A aplicación consta de tres partes ben diferenciadas:
- Axenda
Neste apartado atoparemos os días grandes da festa e unha pequena historia do que acontece ese día, acompañada dunha foto representativa.
- Entroido
Neste punto atapamos información da figura do Cigarrón e a súa historia, ademáis de información puramente turística, como poden ser as zonas de bares, o cartaz das festas e mesmo as orquestras que poderemos ver estes días.
- Social
Neste apartado atoparemos integrados os tweets escritos co hashtag #entroidoVerin, podendo ver todas as mensaxes das usuarias que se producen estes días. Mesmo temos unha ligazón á nosa conta de Twitter pola que podemos deixar tweets xa con ese hashtag sen ter que escribilo.
Só botamos en falta unha cousa, a posibilidade de ter a aplicación en galego. E como ademáis é unha ferramenta para dar a coñecer a festa que conta coa colaboración do Concello non estaría de máis que tamén se puidese traducir a outras linguas ademais da nosa, como o inglés.
Máis aló desta última consideración, é unha aplicación que axuda moito ás visitantes a seguir a axenda destes días en Verín, e se queredes descargala esta é a ligazón á Play Store onde a podedes conseguir de balde.
