A Fundación Vodafone ten unha dilatada experiencia en axuda humanitaria, especialmente en situacións de emerxencia e catástrofes, con solucións do máis diverso e interesantes.
Sen ir máis lonxe, o ano pasado durante o Mobile World Congress puidemos probar Instant Classroom, unha maleta que se convirte en aula dixital que permite ás mestras levar o coñecemento a aulas dos lugares máis remotos do planeta.
O traballo da @FVESP é sempre unha pasada: maleta-aula dixital conectada para países en desenvolvemento #MWC15 pic.twitter.com/YBwq5JbtX6
— Iago Varela Martínez (@iagovarela) March 3, 2015
Un ano antes anunciaran unha mochila – antena 3G (Instant Network) que permitía crear unha rede de voz e datos capaz de montarse nuns minutos e dar servizo a uns cantos dispositivos, especialmente pensada para establecer comunicacións durante terremotos ou outras catástrofes naturais.
Mochila – Antena de #VodafoneMWC para emerxencias. 11 kg, 5 chamadas simultáneas, datos, 100 m de cobertura #MWC14 pic.twitter.com/BK6hG5RWvA
— Iago Varela Martínez (@iagovarela) February 25, 2014
A crise das refuxiadas tamén está a facer que se desenvolvan solucións específicas para elas, polo que Vodafone puxo en marcha en novembro do 2015 Instant Charge, unha ferramenta que ofrece conexión de Internet móbil gratuíta e cargadores de batería para que as persoas que están a fuxir da guerra poidan comunicarse coas súas familias.
Polo de agora hai instaladas 6 estacións de InstantCharge na costa de Grecia. Cada unha delas pode cargar até 66 teléfonos móbiles a un tempo, e inclúen todo tipo de cables e adaptadores para axustarse aos diferentes dispositivos. O acceso a Internet WiFi ofréceno grazas ao uso de tecnoloxías satélite.
Desde Vodafone confirman que nos últimos 3 meses máis de 35.000 persoas empregaron estas estacións para cargar os seus móbiles ou conectarse á rede. Un exemplo máis de como a tecnoloxía pode axudar a termos un mundo máis xusto.
