Seguimos coas probas de terminais máis accesíbeis. Se onte falamos do Energy Phone Max hoxe é a quenda dun dispositivo de Coolpad, o Coolpad Porto S, un dispositivo que podemos atopar á venda por 129 euros.
Coolpad Porto S: especificacións
O trebello conta cunhas prestacións modestas, adaptadas ao seu prezo. A continuación detallamos as máis relevantes:
- Pantalla IPS LCD de 5″ e resolución 720 x 1280 con 294 ppi.
- Procesdor Mediatek MT6735P con CPU Quad-core a 1.0 GHz.
- 1 GB de RAM.
- 8 GB de ROM.
- Batería de 2000 mAh.
- Cámara principal de 8 mpx f/2.4 con flash dualLED e a secundaria conta con 2 mpx.
- DualSIM.
- MicroSD até 64 GB.
Como vedes, con estas características podemos afirmar que non é un terminal de primeiro nível, pero que cumpre en tarefas sinxelas, como poden ser a consulta a actualización das nosas redes sociais, a xestión do correo electrónico e a reprodución de contidos multimedia. Iso si, debemos ter en conta que a pantalla ten unha calidade xusta.
Cámara e batería
No que ten a ver coa cámara de fotos, durante o período de probas puidemos comprobar que é un modelo suficiente para ter un recordo do noso día a día ou para compartir nas redes sociais. Os resultados podedes velos na nosa biblioteca de Flickr.
Por outro lado, un dos aspectos que nos deixou moi satisfeitas foi a duración da súa batería, pois cun uso normal sacámoslle preto de 5 horas de pantalla, o cal é máis ca suficiente para chegar sen problemas ao fianl do día, tendo en conta o tipo de usuaria á que vai dirixido o terminal.
Algo que debemos ter moi en conta é que neste dispositivo é moi necesaria a expansión vía microSD coa que conta este terminal, porque malia ter os 8 GB de memoria interna para a usuaria quedan arredor de 3 GB despois de instalar menos das aplicacións que usamos habitualmente, o que pode non ser abondo para moitas.
En resumo, pesamos que o Coolpad Porto S vai dirixido a un perfil de usuaria que se inicia cos terminais intelixentes ou que só o precisan para consultas puntuais ou manexo de aplicacións de mensaxería. Como vos diciamos, o Porto S podédelo atopar tanto en tendas físicas coma online por un prezo aproximado de 129€.