Hai unhas semanas soubemos que BlackBerry traballaba en tres terminais Android a lanzar durante os próximos meses e onte, por fin, chegou o primeiro deles. É a nova BlackBerry DTEK50, un trebello que aúna nun dispositivo o mellor de Android coas prestacións de seguridade que caracterizan ao fabricante canadiense.
A DTEK50 é un dispositivo de gama media fabricado por TCL e baseado no Alcatel Idol 4. Incorpora unha pantalla con resolución FullHD de 5,2 polgadas, e no seu interior leva un procesador Qualcomm Snapdragon 617, de 8 núcelos e con arquitectura de 64 bits. Está acompañado de 3 GB de memoria RAM e 16 GB de memoria interna, ampliábeis mediante tarxetas microSD de até 2 TB.
A cámara principal é de 13 megapíxeles, con apertura f/2.0, mentres que a frontal é de 8 Mpx con apertura f/2.2; ambas as dúas poden gravar vídeo FullHD a 30 fps. Complementan a listaxe de especificacións unha batería de 2610 mAh de capacidade, conectividade 4G, Bluetooth 4.2 e NFC. Como sistema operativo leva Android 6.0 Marshmallow.
Con todo, o que fai especial a esta nova BlackBerry son os sistemas de seguridade a nível software. A DTEK50 vén con protección para datos privados e contra a instalación de malware, así como o compromiso coas actualizacións de seguridade. O propio dispositivo analiza o nível de seguridade interno e achega consellos ás usuarias sobre como pode solucionalo.
En canto a dispoñibilidade, a nova BlackBerry DTEK50 xa se pode reservar no noso país por 339 euros, con entrega programada para o 8 de agosto. Ademais, as persoas que reserven agora recibirán de agasallo unha batería externa de 12.600 mAh, aínda que só até rematar existencias.
Sobre o papel, pinta ben, pero logo da decepción da Priv, case mellor agardar a velo funcionar.
O que non acabo de entender é o papel que xoga a Canadense neste modelo. Non fábrica o hardware e o SO non é propio.