LEGO Life, a rede social na que compartir as túas creacións de LEGO

Es unha apaixonada do mundo LEGO? Daquela estás de noraboa. O fabricante do mítico xogo de bloques de plástico vén de lanzar a súa rede social oficial, LEGO Life. Trátase dun espazo no que as usuarias poden compartir as creacións que levan a cabo para sorprender a outras persoas.

Este novo proxecto no que se embarca LEGO pretende ser un punto de encontro para toda a súa comunidade, que até o de agora non tiña un foro oficial común, máis aló dun fío de Reddit e os hashtags nas redes sociais habituais.

En certa medida LEGO Life lémbranos a Instagram. Nela podemos crear o noso perfil, seguir a outras usuarias, subir as nosas creacións, dar “gústame” e comentar outras imaxes. Como curiosidade, conta con emojis propios, inspirados nas figuriñas de LEGO, obviamente.

Un equipo dedicado moderará o contido para garantir que LEGO Life sexa un espazo seguro para todas as usuarias, incluídas as máis pequenas. De feito, a privacidade é un dos elementos que LEGO quere coidar, polo que mesmo as imaxes de perfil son en realidade bonecos customizados.

LEGO Life está dispoñíbel tanto en Android como iOS.

About The Author

Reply