Por terceiro ano consecutivo, InnJoo contou con presenza propia no Mobile World Congress. Esta compañía de Dubai, nada no 2014 como unha start up, segue a medrar no mercado europeo, e tras a súa incursión no mercado español, xa comezou a súa expansión ao portugués, italiano e marroquí.
Durante a feira anunciou as principais novidades da marca para esta primeira metade do ano da man de Dani Sordo, o piloto de rallies que fará de embaixador da marca. Entre estes novos produtos atopámonos o InnJoo 4 como buque insignia, mais tamén as series Max4 e Fire4.
O InnJoo 4 é o primeiro dispositivo deca-core da compañía. Leva no seu interior o procesador MediaTek Helio X20 de dez núcleos a 2,3 GHz, ademais de 4 GB de memoria RAM e 64 GB de memoria interna, ampliábeis mediante microSD. As cámaras son de 15 e 5 megapíxeles, e o sistema operativo é Android 7.0 Nougat, aínda que aderezado cunha capa de personalización propia.
Por outro lado, o InnJoo Pro2 aposta polo rendemento, e conta cunha memoria RAM de 6 GB como elemento máis característico. A memoria ROM é tamén de 64 GB, e pode ampliarse con tarxetas microSD de até 256 GB. En canto ao procesador, leva un modelo MediaTek de oito núcleos a 2,3 GHz, e como sistema operativo Android 6.0.
InnJoo tamén avanzou algúns aspectos dos modelos que chegarán nos próximos meses, como o Fire 4 Plus, que será o primeiro smartphone da compañía en inclúir dobre cámara (5+13 Mpx), e levará pantalla de 5,5 polgadas, procesador octa-core e batería de 3000 mAh.
No apartado das tablets, InnJoo anunciou a nova InnJoo F801, un modelo sinxelo de 8 polgadas e resolución 800 x 1280 píxeles, 1 GB de memoria RAM e 8 GB de memoria interna. O seu aspecto máis avanzado é a presenza da conectividade 3G, con funcionalidades completas de teléfono.
Xa por último, InnJoo amosou o InnJoo Leap. Será o primeiro ordenador da compañía, un ultrabook de algo menos de 1200 gramos con Windows 10 que custará 199 €. Está previsto que se presente oficialmente nun evento que terá lugar en dúas ou tres semanas.