Tuenti incorpora seis novas tarifas de fibra con máis gigas no móbil e chamadas ilimitadas

A operadora Tuenti vén de anunciar movementos no seu portfolio de tarifas converxentes fixo – móbil co lanzamento dun total de seis novas propostas, tres para fibra simétrica de 50 Mbps e outras tres para as opcións con 300 Mbps de fibra. Ademais, todas elas levan agora chamadas ilimitadas desde o móbil, así como unha contía de gigas que se adapta ás diferentes necesidades das usuarias.

Deste modo, quen teña abondo coa opción de fibra simétrica de 50 Mbps poderá elixir entre tres alternativas no servizo de móbil:

  • Fibra 50 Mbps + 4 GB + ilimitadas por 40 €/mes
  • Fibra 50 Mbps + 11 GB + ilimitadas por 44 €/mes
  • Fibra 50 Mbps + 20 GB + ilimitadas por 51 €/mes

Por outro lado, aquelas persoas que prefiran máis velocidade na rede fixa poden optar pola modalidade de 300 Mbps simétricos, que tamén se pode combinar con tres alternativas no móbil.

  • Fibra 300 Mbps + 4 GB + ilimitadas por 50 €/mes
  • Fibra 300 Mbps + 11 GB + ilimitadas por 54 €/mes
  • Fibra 300 Mbps + 20 GB + ilimitadas por 61 €/mes

De maneira promocional, as opcións máis económicas que levan 4 GB de datos móbiles disfrutarán do dobre desta cantidade (8 GB ao mes) durante un período de seis meses, tras o cal volverán quedar cos 4 GB da tarifa estándar.

Todos estes prezos que se foron indicando ao longo do artigo son prezos finais, nos que xa está incluído o IVE, a cota de liña, a fibra e o servizo móbil. Ademais, cómpre salientar que non hai permanencia e que a instalación é gratuíta, aínda que hai que matizar que é preciso estar tres meses para que non se penalice ditos traballos de instalación.

Para poder acollerse a estas tarifas é preciso contar con cobertura de fibra óptica de Movistar. Lamentabelmente Tuenti non ofrece alternativa para as usuarias que aínda non teñen cobertura desta tecnoloxía e seguen a empregar a rede ADSL da operadora dominante.

Sobre o autor

Reply