Agora que estamos en verán, esta época evócanos ao bo tempo, á praia e ao mar. Pois falando do mar, así como quen non quere a cousa, hoxe mostrámosvos un xogo que ben ten relación co mar e non é outro que o mítico Afundir a Flota.
O xogo ten uns coidados gráficos que asemellan estar feitos nun caderno de follas cuadriculadas. A preparación do xogo é rápida e sinxela, podemos colocar nós mesmos os barcos ou de modo automático e cando estea listo xa podemos comezar o enfrontamento por turnos. Como é de esperar, gaña o primeiro que logre afundir todos os barcos do rival.
Dispón de enfrontamentos dun só xogador co teléfono como rival, ou de dous xogadores, xa sexa por bluetooth ou por web.
Naval Clash está dispoñible no Market de forma gratuita para android 2.0 ou superior.
