Algo tan cotián como usar un smartphone ou tablet pode ser unha empresa difícil para persoas invidentes ou con pouca visión. Pero como todas e todos sabemos a tecnoloxía pode axudar nestes casos e empresas como CodeFactory están a facer importantes avanzos neste sentido.
Concretamente, CodeFactory ten no Google Play unha aplicación (ou suite de aplicacións) chamada Mobile Accessibility que fai uso da síntese de voz para axudar a estas persoas a levar a cabo varias accións. En concreto son 10 as funcionalidades que permite, vexamos cales son:
- Función Teléfono: facer ou recibir chamadas, identificar ao chamante ou usar as funcións do rexistro de chamada.
- Función Contactos: permite levar a cabo accións relacionadas coa axenda de contactos (incluíndo tamén as amizades de Facebook).
- Función SMS: para ditar ou ler mensaxes sms.
- Función Alarma: activar/desactivar/configurar alarmas.
- Función Calendario: crear ou xestionar os eventos de calendario.
- Función Gmail: empregar o correo electrónico.
- Función Web: navegación por Internet asistida.
- Función “Onde estou?”: uso do GPS para informar da posición actual.
- Función Aplicacións: indícanos as aplicacións instaladas.
- Función Axustes: é onde se cambia o ton de chamada, o modo (vibrador, silencio…) ou a configuración da lectora do texto.
Mobile Accessibility está dispoñíbel en versión de proba durante 30 días de xeito gratuíto. De seguir querendo usala hai que pagar 69 €. Se ben é certo que é un prezo elevado, a gran cantidade de funcións que permite e o traballo de enxeñaría que hai detrás o compensan.
Podedes descargala desde o Google Play.
