Samsung vén de anunciar o lanzamento do Galaxy S WiFi 4.2, un dispositivo Android sen conectividade 3G (non é teléfono) pensado para os entusiastas do multimedia e dos xogos.
Neste sentido, o novo gadget de Samsung conta con pantalla de 3,2 polgadas e cun altavoz frontal, que permitirá sacar o máximo partido ao sistema de audio SoundAlive. A súa cámara é de 2 megapíxeles, que se ben é certo que non permitirá facer fotos impresionantes si que servirá para sacarnos dun apuro. O seu modo de conexión principal é a través de WiFi, aínda que tamén dispón de Bluetooth 3.0 para unha transferencia de arquivos rápida.
Dispón de acceso a todas as aplicacións (e o que estea por vir) de Google Play, pero ademais tamén a Samsung Apps, onde haberá contido exclusivo proporcionado por Samsung. Así, por exemplo, xa trae precargados de xeito gratuíto xogos tan populares como Need for Speed Hot Pursuit ou o FIFA 12.
Estará dispoñíbel en España durante a primeira semana de abril e custará 199 €.
