Aínda que non contemplamos cifras, estamos seguros de que as cámaras de fotos compactas viron mermada a súa cota de mercado co auxe dos smartphones coas (en moitos casos) súas espectaculares cámaras.
Malia todo, estes dispositivos eran até agora un elemento que vivía desconectado. E dicimos até agora porque hoxe mesmo presentouse en España a Galaxy Camera, a cámara con Android de Samsung que chega para ser un gadget máis unido á rede.
Este novo gadget conta cun zoom óptico 21x, sensor 16 M BSI CMOS, lente F2.8 de 23 mm e Smart Mode, unha tecnoloxía de Samsung que ofrece 15 modos de toma de fotografía predetermiados, ademais de configuracións manuais que permiten sacar fotos de gran calidade.
A pantalla táctil é de 4,8 polgadas, o procesador é de catro núcleos a 1,4 GHz e conta con Android 4.1 Jelly Bean, o que permite que instalemos a meirande parte das aplicacións da Play Store. A súa memoria interna é de 8 GB, quizais un tanto escasa pensando nun dispositivo que xera imaxes e vídeos de gran tamaño, pero sempre podemos ampliar grazas ás tarxetas microSD.
Pero sen dúbida o máis rechamante é a súa conectividade, xa que conta con 3G e WiF, de tal xeito que podemos compartir as nosas fotos de calidade e vídeo HD estemos onde estemos (iso si, como tiremos de 3G ben podemos ter un plan de datos amplo) en calquera rede social, enviar por correo electrónico ou subir á un cartafol na nube.
E canto custa? Pois nin máis nin menos que 499 €. Que vos parece? É un prezo axeitado para un dispositivo como tal ou é algo excesivo? Mercaríadela?
