Hoxe traémosvos unha nova análise dun dispositivo da liña L-Style de LG, concretamente o L3, tras ter pasado polas nosas mans o L5 e o L7 (nos vindeiros días falaremos do L9).
Trátase do terminal máis económico de todos, de características básicas e reducido tamaño, pensado para usuarios básicos que queren un teléfono con “algo máis”.
Deseño, acabado e conexións
Seguindo a liña marcada pola compañía coreana, o L3 repite as formas cadradas e a inclusión dun botón físico na parte frontal central. Os acabados son en plástico, rugoso na parte traseira, e rodeando todos os laterais ten unha banda metálica, que lle dá un aspecto de maior calidade.
Como comentabamos ao comezo, estamos a falar dun terminal de reducidas dimensións (102,6 x 61,6 x 11,7 mm) e dotado das conexións/sensores básicas en calquera Android (microUSB, WiFi, GPS…).
No lateral esquerdo sitúanse os botóns de subir e baixar volume, quedando o dereito totalmente libre. Na parte superior atópase o botón de acendido así como tamén o conector de jack 3.5 mm. A parte inferior queda reservada unicamente para o microUSB.
Pantalla
A pantalla do L3 é de 3,2 polgadas, cunha resolución QVGA (320 x 240 píxeles). O máis chamativo da mesma é que resulta moito máis cadrada das habituais pantallas alongadas, por adaptarse ao tamaño compacto do terminal. Isto en certa maneira limita a visión nas redes sociais ou webs, ao ter que facer demasiado scroll.
Malia ser un panel de non grandes características, consegue unhas cores bastante vivas, grazas a un bo brillo, que tamén lle dá boa visibilidade en entornos exteriores.
Sistema operativo
Como sistema operativo incorpora Android 2.3 Gingerbread, que non será actualizábel. Esta limitación débese a que é unha versión que rinde moi ben en dispositivos con características técnicas básicas. Ademais incorpora unha capa de personalización de LG, non demasiado invasiva.
Cámara
A cámara ten un sensor de 3 megapíxeles, sen flash, o cal é unha limitación importante. Así que, como podedes imaxinar a súa inclusión é puramente “cumplidora”.
Batería
A batería é de 1500 mAh, que supera en autonomía práctica á meirande parte de dispositivos, chegando a durar 2 días sen moito problema. Isto ten a súa explicación por ter unha pantalla pequena.
Conclusións
O L3 cumpre todas as características de “básico”: o procesador é mononúcleo a 800 MHz, ten 348 MB de memoria RAM e uns escasos 150 MB para aplicacións. Ademais dispón de 1 GB de memoria interna para outros cometidos e ranura microSD, co que se pode aumetnar o espazo.
Polo tanto, este terminal está orientado a un público pouco esixente e iniciador. Recomendaríamolo para xente que use as funcións habituais dun teléfono e aplicacións de comunicación tipo Whatsapp ou consultas puntuais de mapas e/ou Internet. Quen vaia facer un uso máis intensivo do terminal (redes sociais, correo electrónico, fotos…) sentirase limitado.
A súa principal baza é o prezo, xa que se pode adquirir por uns 100 € en tendas como Amazon. R, quen nos prestou este dispositivo para facer a análise, ofréceo a 0 € para consumos de 9 €/mes.
Boas! Eu teño este terminal (LG L3) e anda moi escaso de memoria interna… Poderíase configurar para que garde as aplicacións ou descargas na memoria externa? cada actualización case é unha odisea (e só teño o whatsapp e o line!
Grazas!
Ola Iria,
O problema deste terminal, ao igual ca outros dispositivos de iniciación, é a escasísima memoria interna. Ao principio isto non é un problema, porque vén limpo, pero co paso do tempo empeza a ser preocupante.
Hai algún tempo redatamos este artigo http://www.mallandonoandroid.com/2012/02/trucos-para-liberar-espazo-no-teu.html no que falamos dalgúns “trucos”.
– Mover aplicacións á SD. Se non sabes cales son, podes descargar “App 2 SD” da Play Store e xa che amosa que aplicacións son movíbeis, porque non todas o son.
– Borrar cachés: as aplicacións xeran datos e gardan cachés (imaxina, conversas infinitas no Whatsapp, datos que descargan aplicacións como Facebook para non ter que cargar as fotos unha e outra vez…) que debemos limpar de vez en cando, para liberar memoria e ter maior fluídez. Explicamos nese post que enlazamos como facer iso.
Finalmente,outra opción, ademais das que comentamos nese artigo é borrar as actualizacións das aplicacións que non usemos (coidando, claro está, de non volver instalalas cando nos notifique que “hai actualizacións”. Imaxina, por exemplo, que non usas a aplicación de Facebook (ou que fas un uso moderado): darache igual ter unha versión anterior, xa que as novidades adoitan ser escasas. As versións máis próximas ás orixinais adoitan ser máis lixeiras en canto a consumo de memoria.
Se aínda facendo todo iso tes problemas de memoria, fai o mesmo coas aplicacións que uses: volve a unha versión anterior en vez de ter a última instalada.
Agardamos que estes pequenos trucos sírvanche de axuda.