A compañía francesa Archos vén de anunciar que levará ao CES de Las Vegas os seus primeiros dispositivos 4G, no seu afán de achegar aos usuarios terminais cunha boa relación calidade – prezo e acceso ás últimas tecnoloxías en redes móbiles. Formarán parte desta gama 4G o 45 Helium e o 50 Helium.
Ambos os dous dispositivos comparten moitas das características, como o procesador de catro núcleos a 1,4 GHz, 1 GB de memoria RAM ou todo o apartado de conectividade. Así mesmo, os dous saen á venda con Android 4.3, que será actualizado a KitKat (4.4) nas próximas semanas.
Centrándonos nas particularidades, o 45 Helium dispón dunha pantalla de 4,5 polgadas (854 x 480), 4 GB de memoria interna ampliábeis por microSD, cámara principal de 5 megapíxeles (frontal VGA) e unha batería de 1700 mAh.
Pola súa banda, o 50 Helium incorpora unha pantalla de 5 polgadas (1280 x 720), 8 GB de memoria interna ampliábeis, cámaras de 8 e 2 megapíxeles (traseira e frontal respectivamente) e batería de 2000 mAh.
Estarán á venda a un prezo que rondará os 229 € a partir do segundo trimestre.
