LG presenta en España o seu primeiro terminal curvo, o LG G Flex

LG vén de presentar en Madrid o seu dispositivo máis novidoso e peculiar, o LG G Flex, un terminal no que destaca a súa pantalla P-OLED (Plastic OLED) curva de 6 polgadas, cunha resolución de 1280 x 720 píxeles, e a inclusión das tecnoloxías elastic coating e shelf healing, grazas ás que pode autorreparse de pequenas rabuñadas e soportar pesos de até 8 kg.

O resto de especificacións deste dispositivo non destacan sobre calquera outro gama alta, pasando por un procesador de 4 núcleos a 2,26 GHz, 2 GB de memoria RAM, 32 GB de memoria interna e cámaras de 13 e 2,1 megapíxeles. A batería, seguindo a liña da compañía nos últimos terminais, é de gran capacidade (3500 mAh), aínda que adopta a forma curva para aproveitar mellor o espazo.

No que ten a ver co deseño, a curvatura (equivalente a unha circunferencia de 7 metros de radio) fai que o dispositivo se adapte perfectamente á nosa faciana, resultando moito máis cómodo de soster á hora de falar por teléfono. Os botóns físicos volven estar situados na parte traseira, posición que resulta moito máis accesíbel para o seu manexo cunha soa man.

Non se esqueceu o fabricante coreano de incluír as últimas novidades de software sobre Android 4.2.2 (será actualizado nas próximas semanas), entre as que están as que xa coñecemos co G2 e outras novas pensadas para sacarlle todo o partido á pantalla curva, como Quick Theater para acceso rápido á multimedia, a posibilidade de dividir a pantalla para facer 2 cousas a un tempo e un sistema de desbloqueo cambiante.

Dispoñibilidade e prezo

En canto á súa comercialización, o LG G Flex pódese adquirir a través de Vodafone, operadora que o comercializará en exclusiva durante 3 meses, e no mercado libre por 799 € a partir da próxima semana.

Coa operadora vermella, o prezo do terminal depende da tarifa e do que se teña contratado. Son os que figuran na seguinte táboa: