Malia as ducias de smartphones que ten Samsung no mercado, se hai dous terminais da compañía que merecen especial atención son os das liñas Galaxy S e Galaxy Note. Durante o Mobile World Congress deste ano puidemos descubrir o Galaxy S5, un dispositivo que chegou en medio de grandes espectativas. Cumpriunas ou foi máis do mesmo? Nesta análise propoñémonos dar resposta a esta pregunta.
Deseño, acabado e conexións
Aínda que non estamos ante un cambio de deseño radical, no novo Galaxy S5 introdúcense novos acabados que, sen fuxir do plásitco, achegan sensacións visuais e ao tacto dunha maior calidade e durabilidade, sen aumentar o peso. Así mesmo, tamén é resistente á auga segundo a normativa IP67, malia non ser un terminal unibody, xa que a súa tapa posterior é extraíbel. Tras ela atópanse detalles como o lector de microSIM compartindo espazo co lector de tarxetas microSD que nos permite ampliar notabelmente a capacidade interna do dispositivo.
Na parte frontal do dispositivo temos o botón central físico de inicio que caracteriza a Samsung, un elemento que a meirande parte dos fabricantes foron abandonando tras a recomendación de Google de integrar botoneiras físicas. En calquera caso, neste terminal está xustificado, xa que é un lector de pegadas dixitais que nos servirá, entre outras cousas, para poder desbloquear o teléfono. Na parte superior desta cara frontal temos unha cámara e os sensores de proximidade, xunto ao nome da fabricante.
Facendo un percorrido polos seus marcos laterais atopámonos os botóns de volume no lado esquerdo, o de acendido no dereito e o conector jack 3.5 na parte superior, onde tamén está o sensor de infravermellos. Na parte inferior, agochado por unha tapa un tanto incómoda de recolocar, o conector microUSB.
Na parte posterior do teléfono temos a cámara, e xunto ao seu fash LED un lector de pulso que nos servirá para contar as pulsacións cada vez que queiramos, algo que vén ligado ás aplicacións de saúde S Health e os complementos wearables que está a desenvolver a compañía (liña Gear).
Pantalla
A pantalla do Samsung Galaxy S5 é de 5,1 polgadas. Trátase dun panel SuperAMOLED con protección Gorilla Glass 3 e resolución 1080 x 1920 píxeles (432 píxeles por polgada). Unha vez máis o fabricante coreano sorpréndenos cunha pantalla cun brillo e un contraste superlativo, que ofrece unha experiencia de usuario moi positiva, mesmo en condicións lumínicas adversas.
Sistema operativo
O Galaxy S5 saíu á venda con Android 4.4.2 KitKat e está previsto que reciba a actualización a 4.4.3 nos próximos días. Por suposto, trae TouchWiz, a interface do fabricante coreano, que este ano vén con novos botóns de axustes, moito máis atractivos que nas versións anteriores, así como tamén cunha nova organización dos mesmos.
A barra de notificacións permite alternar entre un menú simplificado ou completo, con acceso directo a unha chea de opcións, como xestión das conexións, modos de aforro de enerxía ou bloqueos. Pola súa banda, o renovado menú de axustes integra un buscador que axiliza o proceso de atopar o que buscamos no mesmo.
En canto á organización de aplicacións, admite a creación de cartafoles tamén dentro do menú, unha función que nos axuda a ter todo máis organizado. Non é tan positivo que só permita 4 columnas nas pantallas principais, pois cunha pantalla tan grande dá a sensación de ter pouco aproveitado o espazo.
Entre as aplicacións específicas chamounos a atención o renovado S Health, a ferramenta que teremos que empregar para ler o noso pulso, e coa que poderemos levar o control da nosa actividade física e do que comemos. Do mesmo xeito, tamén cómpre destacar o modo nenos, que transforma o noso smartphone nun aparello simplificado pensado para os pícaros, incluíndo apliccións específicas e control parental para que non faga ningunha trasnada 😉
Cámara
A cámara é outro dos aspectos máis destacados dos S5. Como xa temos comentado noutras ocasións, máis megapíxeles non é sinónimo de maior calidade, senón que hai moitos outros aspectos que fan que as imaxes sexan mellores ou peores, entre elas, o seu postprocesado.
Desta vez Samsung escolleu un sensor propio de 16 polgadas para a cámara principal e de 2 para a frontal, fuxindo de Sony, anterior proveedor destas. Destaca a cantidade de modos que se poden empregar (mesmo se poden descargar modos adicionais) para sacar imaxes perfectas. Seguramente o máis destacado sexa enfoque selectivo, mais tamén e de relevancia “percorrido virtual”, que nos permite facer unhas especie de “Street View caseiro” mentres imos percorrendo un espazo.
O modo nenos que comentabamos antes tamén ten acceso á camara, aínda que como podedes ver na seguinte imaxe, a súa interface é infinitamente máis minimalista.
Deixámosvos algunhas mostras de fotos tomadas co Galaxy S5 en diferentes condicións. Podedes ver o álbume completo no noso perfil de Flickr.
Batería
A batería do S5, a diferenza do que estamos a ver na práctica totalidade dos dispositivos de gama alta, é extraíbel, polo que poderemos mudala ante calquera sígno de deterioro. Ten unha capacidade de 2800 mAh e ofrece unha autonomía que varía entre un día se estamos moito enriba del, puidendo chegar a dous nesas ocasións en que deixamos o móbil algo de lado.
Gustounos moito o modo de aforro de enerxía que implementa, chamado “modo ultraahorro de energía“, o mellor que vimos até o de agora nun smartphone. Grazas a el podemos multiplicar a duración da batería en varios días, deixando activas só as aplicacións que queremos ter dispoñíbeis (por exemplo redes sociais ou mensaxería) e mudando a pantalla a branco e negro. Co 55% a duración da mesma chega aos 6,8 días.
Conclusións
As especificacións hardware do terminal (procesador Qualcomm Snapdragon 801 de catro núcleos a 2,5 GHz, 2 GB de RAM) xa nos sitúan na gama alta de Android, non atopando moitas diferenzas co que ofrece a competencia. O terminal móvese moi fluído e pode con calquera aplicación ou xogo que lle botemos, aínda que ten certo lag ao abrir a galería.
Trátase dun dispositivo que cumpre de sobras coas espectativas e achega un importante esforzo pola experiencia de usuario, diferenciándose de Android estándar para ter a súa propia identidade, aínda que tamén pode botar para atrás a usuarios que non queiran ter instaladas aplicacións que non usan.
En calquera caso, o Galaxy S5 é un dos candidatos que compiten por ser o móbil do ano. Podemos atopalo por uns 500 € en numerosas tendas en liña, así como tamén a través dos programas de financiamento de moitos operadores.