Vimos de probar estes días Troposfera QA que é unha aplicación feita por desenvolvedores galegos e serve para coñecer o índice de calidade do ar para saber se temos que tomar algunha precaución ou non. A cotío estamos preocupados por saber se chove ou fai sol, se fará frío… pero poucas veces miramos como é a calidade do ar que respiramos.
O funcionamento da app é moi sinxelo, só temos que configurar unha localización que pode ser na que estamos ou meter a man un destino determinado. Unha vez completado este paso, temos toda a información que nos amosa a aplicación como vemos na seguinte captura.
Ademáis de poder facer unha consulta para unha hora determinada do día (parte inferior da captura), temos moitas opcións para recibir información polo miúdo e só temos que premer na interrogación ou en +info para acceder a ela. A información que nos achega a app podémolo ver nas seguintes capturas.
Todo está moi ben explicado e con detalle, polo que non precisamos coñecer todos estes termos, que de primeiras poden resultar novidosos para moitas de nós, ademáis de aportarnos información valiosa.
A maiores a aplicación ten unha opción para descubrir novas relacionadas co medio ambiente ao que podemos acceder dende o menú na parte esquerda.
Se estades interesados en descargar Troposfera QA, tédela dispoñíbel para a descarga de balde na Google Play Store.
