A consolidación do mercado das telecos esta en marcha, e supón un regreso aos ‘tempos de antes’, cun puñado de empresas grandes que manexan as comunicacións dun gran número de clientes a costa de eliminar a competencia.
Os últimos grandes movementos foron a compra de Ono por parte de Vodafone e, máis recentemente, a de Jazztel por parte de Orange. A primeira supuxo que Vodafone teña agora unha ampla rede de fibra óptica en todo o territorio do Estado agás en Galiza, Euskadi e Asturies, onde o mercado de banda larga fixa está dominado polos cableiros rexionais. Para Orange, facerse con Jazztel supón adiantar a Vodafone e converterse no segundo operador algo que, imaxinamos, a Vodafone non lle chista moito.
R, Telecable e Euskaltel suman unha facturación anual de 685 millóns de euros e 850.000 clientes, e semella que hai sinxerias que apuntan a posíbeis compras entre elas. A saída a bolsa de Euskatel non foi máis que o punto de partida para que os fondos de inversión donos da empresa colleran liquidez, o que lles permitiría facerse coa asturiana Telecable, que ten colgado un fermoso cartel de venda. Pola súa banda, CVC, o fondo que controla R, tamén estaría interesado en facerse con Telecable e quizais integrar ambas compañías para facelas máis fortes, polo que en breve podería comezar o baile de ofertas.
O que parece seguro é que sexa quen sexa quen se faga con Telecable, o resultado a medio prazo vai ser unha fusión das tres compañías, que xuntas serían un apetitoso xoguete para Orange ou Vodafone, ambas cunha presenza residual na banda larga fixa nestes territorios. Se temos en conta que tanto R como Telecable teñen a Vodafone como socio proveedor de rede móbil, deixar escapar o conxunto de cableiros suporíalle á compañía británica perder medio millón de clientes da súa rede de móbil, e o que é peor, perder o retorno de inversión en rede que fixeron para dar cobertura a tal número de clientes (caso de Galiza, onde a rede de Vodafone soporta a primeira e terceira compañía móbil en número de clientes).
Por todo isto, que as cableiras do norte están preparándose para ser absorvidas por Vodafone dáse por feito, sendo a pregunta do millón o “cando”. Certas fontes apuntan a que podería ser no 2016, aínda que non podemos deixar de lado a outra posibilidade, moito menos probábel e quizais algo ilusa: que todo quede como está.
Vós que pensades?
É unha historia da que se leva falando donde fai polo menos 15 anos, e coas cableiras do norte nunca se avanzou.
Certo é que está vez están máis preto, pero esta situación xa se viviu fai uns anos, cando R e Euskaltel estuvieron a piques de comprar Telecable e o resultado foi que un fondo independente levou a compañía asturiana. Así que non dedes nada por seguro.
E de todas formas, non creades que Kutxa ten posición vendedora. En Euskadi hai máis vocación de facer país con empresas, e non van vender tan fácilmente.
Xa o vetemos nos próximos meses
Teño a esperanza de que iso non pase. Teño R e estou encantado co soporte (sobre todo online). Non podo dicir o mesmo de cando estiven con Vodafone. Por outra parte, teño algún compañeiro no País Vasco e falan moi ben de Euskaltel. Se queda Vodafone con elas, teño dúbidas de que o servizo vaia a mellor.