Tras moito ruxe – ruxe e varias semanas de teaser, o reloxo froito da colaboración entre Fossil, Google e Intel xa é oficial. Falamos do Fossil Q Founder, un smartwatch que leva Android Wear no seu interior.
O trebello ten un deseño que inclúe unha caixa circular cunha coroa a modo de botón no lateral dereito do dispositivo. Os acabados son en aceiro inoxidábel, con correas intercambiábeis, aínda que nos paquetes estándar xa poderemos elixir entre coiro ou metal.
Das especificacións técnicas pouco se falou durante a súa presentación, aínda que obviamente o procesador é un Intel. Imaxinamos que a memoria RAM e a interna serán de 512 MB e 4 GB, capacidades comúns a todos os smartwatches Android Wear presentados até o de agora.
Está previsto que o novo Fossil Q Founder estea á venda nas próximas semanas desde 275 dólares nos Estados Unidos, e polo de agora non hai novas da súa posíbel posta á venda en Europa.