WhatsApp vén de acadar un novo fito na súa historia ao acadar os 1.000 millóns de usuarias activas mensuais, unha cifra que fai que se manteña líder entre as aplicacións de mensaxería isntantánea, malia non ser nin a que máis funcións ten nin a máis segura.
WhatsApp, propiedade de Facebook desde que a compañía que dirixe Mark Zuckerberg se fixo con ela por 19.000 millóns de dólares, non para de medrar, e nos últimos tempos vimos como se foron engadindo pequenas funcionalidades que a melloran, como WhatsApp Web, as chamadas ou a copia de seguridade das conversas en Google Drive.
Ademais, hai tan só uns días a compañía mudou o modelo de negocio e deixará de cobrar os famosos céntimos anuais polo servizo, e segundo se desprende duns comentarios do servizo de tradución non tardará en engadir a posibilidade de compartir documentos ou a videochamada.
Facebook: 1590 millóns de usuarias activas ao mes
Pero se boas son as cifras de usuarias de WhatsApp mellor son as de Facebook, que xa conta con 1590 millóns de usuarias activas ao mes a nível mundial, o que se traduce nuns ingresos de 5480 millóns de dólares durante o último trimestre do ano pasado, provintes a maior parte deles da publicidade móbil (80%).
