A Mesa pola Normalización Lingüística vén de presentar esta mañá A Liña do Galego, unha aplicación coa que as usuarias poden facer todo tipo de consultas ou queixas relacionados coa nosa lingua.
Esta aplicación lanzada pola Mesa supón unha canle máis de comunicación coa que poderemos comentar se nunha empresa, institución, … atopamos algún tipo de problema para empregar a nosa lingua ou se nos poñen trabas para recibir información en galego. Tal e como vemos na imaxe superior, a app conta cun sinxelo formulario para plantexar a nosa situación, e ademais poderemos anexar fotografías que axuden a describir o problema.
Mais non todo van ser queixas! A aplicación tamén permite parabenizar a aqueles lugares nos que teñen unha actitude positiva co galego e, polo tanto, onde calquera galegofalante pode sentirse como na casa.
Ao recibiren as queixas, A Mesa pola Normalización Lingüística abre un expediente numerado para facerlle un seguementoe de xeito anual, realízase un informe con todas as consultas, queixas e parabéns realizados para facer un diagnóstico e mellorar aquilo que sexa preciso no seguinte ano.
A Liña do Galego está dispoñíbel para a descarga de xeito gratuíto nesta ligazón á Play Store.