Hai uns días falámosvos das tarifas de FreedomPop para o noso país, a operadora que ofrece unha liña de móbil gratuíta ou tarifas que inclúen unha cantidade datos abonda por prezos de risa. Hoxe faise oficial e xa podemos solicitar unha tarxeta SIM desta novidosa compañía.
As tarifas da compañía resúmense en 5 plans de prezos a elixir, que mudan lixeiramente sobre as que falaramos.
- Free: 100 minutos, 300 SMS e 200 MB de datos por 0 €/mes
- Plan 1: 200 minutos, 500 sms e 1 GB de datos por 4,99 €/mes
- Plan 2: chamadas e sms ilimitados e 2 GB de datos por 8,99 €/mes
- Plan 5: chamadas e sms ilimitados e 5 GB de datos por 15,99 €/mes
- Plan 10: chamadas e sms ilimitados e 10 GB de datos por 28,99 €/mes
Ademais, todos os plans inclúen uso de WhatsApp sen computar no consumo de datos móbiles, aínda que nisto hai unha política de uso razoábel que limita aproximadamente este uso a 500 MB/mes. Tamén inclúen roaming en 25 países (Comunidade Europea e Estados Unidos), malia que proximamente tamén se sumarán a esta listaxe Brasil, México, Tailandia e Vietnam.
En canto aos sobrecustes, no caso de precisar máis datos os megas cobraranse a 1,5 céntimos/MB no caso de sermos usuarias do plan básico ou a 1 céntimo/MB se somos de calquera outro de pago. Tamén poderemos acumular os datos non consumidos mes a mes (até 20 GB), aínda que para iso debemos contratar un servizo extra que ten un custo de 1,99 €/mes. FreedomPop tamén aplicará certos comportamentos sociais, polo que por exemplo as usuarias poderán pasarse os datos que non usen e por cada recomendación recibirán 20 MB/mes extra.
As chamadas que se inclúen nas tarifas máis básicas son a través de vozIP, é dicir, por Internet. Pero tamén ofrecerán un servizo de Voz Premium (con custe nos plans básicos, gratuíto nos altos) que permitirá chamar vía GSM.
En canto a cobertura, empregan a rede de Orange e contan con 4G, aínda que están a falar con un segundo operador para ter unha rede máis extensa, algo que nos recorda ao funcionamento da operadora móbil de Google.
Con todo, polo de agora a operadora comeza a operar na súa fase beta, na que iremos entrando por orde de inscrición, e tampouco permite facer portabilidades desde números actuais, algo para o que teremos que agardar aínda uns meses.
Podedes saber máis na súa web.
