Se non podes evitar as filtracións… adiántate ti. LG vén de dar a coñecer os seus novos dispositivos de gama media e baixa para o primeiro trimestre de 2017, que verán a luz no CES 2017, que comeza con novo ano na cidade de Las Vegas. Trátase da nova serie K, que estará formada por 4 novos modelos, e a terceira xeración do Stylus 3.
LG serie K
Unha vez máis a filosofía da nova serie K é a de ofrecer a cada consumidor o dispositivo que precisa. Por iso, cada modelo está orientado a un público específico, cun dispositivo que destaca na súa gama, o K10, un máis básico, o K8 e dous que practicamente serven unicamente para o WhatsApp, os K4 e K3.
| LG K10 | LG K8 | LG K4 | LG K3 | |
| Pantalla | 5,3” HD (1280 x 720) | 5” HD (1280 x 720) | 5” FWVGA (854 x 480 | 4,5” FWVGA (854 x 480) |
| Procesador | Octa Core 1,5 GHz | Quad Core 1,4 GHz | Quad Core 1,1 GHz | Quad Core a 1,1 GHz |
| RAM | 2 GB | 1,5 GB | 1 GB | 1 GB |
| Memoria | 16 / 32 GB + microSD até 2 TB | 16 GB + microSD até 32 GB | 8 GB + microSD até 32 GB | 8 GB + microSD até 32 GB |
| Cámaras | 13 / 5 Mpx | 13 / 5 Mpx | 5 / 5 Mpx | 5 / 2 Mpx |
| Batería | 2800 mAh | 2500 mAh | 2500 mAh | 2100 mAh |
| Outros | LTE, lector de pegadas dixitais, NFC | LTE, NFC | LTE | LTE |
| Cores | Negro, titán, ouro | Prata, titán, ouro, azul escuro | Negro, titán | Negro |
Como se pode ver na táboa anterior, o LG K10 é o máis avanzado, incluíndo lector de pegadas dixitais e NFC, maior capacidade de memoria e a posibilidade de traballar con tarxetas microSD de até 2 TB de capacidade. O LG K8 vai un paso por detrás, aínda que conserva as prestacións do K10, especialmente na cámara, con modos que poden ser interesante para certos perfís de usuario, como o Auto Shot ou Gesture Shot para selfies. Ambos os dous veñen con Android 7.0 Nougat.
Os LG K4 e LG K3 son terminais moi básicos, unicamente útiles para usuarias co mesmo perfil: persoas que queiran ter un trebello alternativo para chamar, WhatsApp… e pouco máis. Neste caso, o sistema operativo de partida é Android 6.0 Marhmallow, polo que o máis probábel é que xa non se actualicen nunca.
LG Stylus 3
Por outro lado está o Stylus 3, a terceira versión deste modelo de gama media con lapis. A gran novidade desta nvoa versión é a mellora do stylus, con punta de fibra de 1,8 mm para afinar máis á hora de usalo como un bolígrafo sobre a pantalla.
Dispón dalgunha que outra funcionalidade extra para sacarlle partido a este lapis, como Pen pop 2.0, que nos permite ter as notas á vista cada vez que sacamos o stylus, Pen Keeper para alertar de que deixamos o lapis lonxe e Screen-off Memo, para tomar notas sobre a pantalla mesmo cando esta está apagada.
O Stylus 3 vén con pantalla de 5,7 polgadas HD (1280 x 720), procesador MediaTek MT6750 de oito núcleos a 1,5 GHz, 3 GB de memoria RAM, 16 GB de memoria interna (+microSD até 2 TB) e batería de 3200 mAh. As cámaras son de 13 e 8 megapíxeles, leva LTE, lector de pegadas dixitais e como sistema operativo Android 7.0.
Dispoñibilidade e prezo
Todos estes novos trebellos están pensados para se anunciar durante o CES de Las Vegas, polo que até esa data non se coñecerán as datas da súa posta á venda nin o prezo.
