Moitas nos sorprendimos de que Xiaomi decidise non estar de maneira oficial no Mobile World Congress de Barcelona, sobre todo despois da súa presenza no CES de Las Vegas. Porén, o fabricante chinés non quere perder o tirón mediático deses días e vén de programar un evento para o 28 de febreiro, aínda que na China.
Ese día Xiaomi presentará o seu primeiro procesador para móbiles, o Xiaomi Pinecone, mais todo apunta a que podería vir acompañado dun novo smartphone que o implementase, como podería ser os rumoreados Xiaomi Meri ou o Xiami 5C.
Tamén hai varios rumores que apuntan a que este novo procesador chegaría en dúas versións. O máis básico sería o V670, fabricando con arquitectura de 28nm. Tería oito núclos, dos cales catro serían Cortex A-53 de alto rendemento e outros catro Cortex A-53 para aquelas labores máis liviás.
Por outro lado teríamos o V970, tamén con oito núcleos. Porén, neste caso teríamos catro Cortex A-73 con frecuencia mínima de reloxo de 2.0 GHz e máxima de 2,7 GHz, e outros catro Cortex A-53.
Teremos que agardar á data de presentación para descubrirmos todas as características deste novo modelo de procesador, mais tendo en conta a evolución empresarial de Xiaomi, poderíamos asegurar que nace un forte competidor a Qualcomm, MediaTek, Samsung e Huawei, os catro grandes que se reparten boa parte do pastel neste segmento de produto.