Moitas pensaban que Huawei repetiría a estratexia de anunciar os seus smartphones de referencia no Mobile World Congress de Barcelona, pero nas últimas semanas sóubose do cambio de plans da marca, o que fai que teñamos que agardar a finais de marzo (concretamente, ao día 27) para coñecelos.
Porén, o fabricante chinés celebrou hoxe un evento de prensa para anunciar un novo computador, o Matebook X Pro, e unha nova serie de tablets Android orientadas á gama alta, as MediaPad M5, que están dispoñíbeis en dous tamaños (8,4 e 10,8 polgadas) para adaptarse ás diferentes necesidades das usuarias.
Huawei Matebook X Pro
O Huawei Matebook X Pro é un portátil ultradelgado de 13,9 polgadas con panel FullView 3K táctil e un ratio de pantalla do 91%, o que fai que os marcos sexan mínimos e haxa que buscar solucións alternativas a cuestións como a situación da cámara, algo que o fabricante chinés resolveu dun xeito bastante curioso, como podemos ver no seguinte vídeo.
Tiña que probalo ? #MWC18 pic.twitter.com/4OAde82JEr
— Iago Varela Martínez (@iagovarela) February 25, 2018
Están equipados con procesadores Intel Core i7 / i5 de oitava xeración, gráficos NVIDIA GeForce MX150 GPU con 2 GB e unha batería de 57,4 Wh de capacidade. En total hai un total de tres versións, coas seguintes combinacións de procesador / memorias:
- i5 + 8 GB de RAM + 256 GB de SSD
- i7 + 8 GB de RAM + 512 GB de SSD
- i7 + 16 GB de RAM + 512 GB de SSD
Segundo informa o fabricante, trátase dun dos portátiles máis lixeiros do mercado, e tamén dos máis finos. A diferenza do modelo que o precede, este recupera un USB Tipo A (ademais dos dous portos USB-C), o que evita ter que andar con adaptadores para conectar ratos ou outros periféricos básicos.
Na parte multimedia temos que destacar o sistema de son, xa que conta con Dolby Atmos Sound System e altofalantes personalizados para ofrecer un son envolvente e á vez inmersivo para que flúa tanto por riba como arredor da usuaria. Ademais, dispón tamén de micrófonos envolventes para que nunha videochamada o son quede recollido de maneira máis precisa.
Huawei MediaPad M5
Por outro lado temos as novas tablets, as Huawei MediaPad M5. Trátase, como xa adiantamos antes, de dous modelos orientados á gama alta que están dispoñíbeis en dous tamaños, 8,4 e 10,8 polgadas. Ambos modelos destacan polo seu deseño ergonómico e curvatura do cristal 2.5D, así como por unha calidade dos paneis 2K mellorados por ClariVu 4.0.
Todas as variantes levan procesador Kirin 960 de 8 núcleos, así como 4 GB de memoria RAM. Para a memoria interna ofrécense un total de tres alternativas: 32, 64 ou 128 GB (agás o modelo Pro, só dispoñíbel en 64 e 128 GB), así como a opción e coller conectividade WiFi ou LTE.
A versión de 10 polgadas ten unha variante “pro”, que vén equipada cunha funda de teclado e un lapis chamado M-Pen capaz de detectar 4096 puntos de presión. Ao usar a tablet con esta funda actívase o modo escritorio, que muda a interface para adaltala a un uso máis semellante a un ordenador ca a unha tablet.
Dispoñibilidade
As tablets Huawei MediaPad M5 de 8,4 e de 10,8 polgadas están dispoñíbeis no noso país desde este mesmo luns, mentres que para a versión “pro” haberá que agardar ao mes de maio. Por outra banda, o Matebook X Pro non ten aínda unha data concreta, mais será ao longo do segundo trimestre do ano.
