Na Play Store podemos atoparnos cunha boa variedade de dicionarios de diferentes idiomas, mais se falamos do galego as opcións redúcense notabelmente. Un dos últimos en chegar á tenda de aplicacións de Android é Galnet, desenvolto por un grupo de investigadores do Seminario de Lingüística Informática da Universidade de Vigo.
Galnet non é un dicionario ao uso, senón que está baseado en Wordnet, unha metodoloxía na cal os vocabularios das linguas están agrupados como redes de nodos, e conta con 750.000 palabras (unhas 70.000 en galego) incluíndo traducións e sinónimos para 10 linguas: galego, portugués, catalán, vasco, español, inglés, alemán, latín, italiano e chinés (tradicional e simplificado).
O uso da aplicación é bastante sinxelo, e o seu manexo moi intuitivo. Bástanos con facer a selección do idioma e escribir a palabra que queremos buscar; apareceranos nunha mesma pantalla todos os idiomas dispoñíbeis para a mesma.
A nosa experiencia coa aplicación foi positiva, especialmente no sentido da usabilidade. Se ben é certo que quedan moitos vocablos por introducir e que se poderían mellorar aspectos como a velocidade de resposta ou a posibilidade de click trough como xa fan outros dicionarios dispoñíbeis na Play Store, supón unha ferramenta de gran utilidade e pensamos que pode ter un futuro prometedor.
A aplicación pódese descargar de balde desde a Play Store.
