Google anunciou esta semana o lanzamento de Google Workspace, unha nova plataforma de colaboración destinada a empresas de calquera tamaño que chega para substituír e unificar o que antes era G-Suite. O lanzamento tamén coincide coa renovación da imaxe de marca dos servizos vencellados, como Gmail, Calendar, Drive, Docs e Meet, que estrean nova icona.
O obxectivo principal da actualización deste servizo é crear unha ferramenta potente que unifique todo o que ten que ver coa comunicación e a colaboración, incluíndo os servizos de correo electrónico, comunicación por voz e vídeo, almacenamento e traballo compartido nun mesmo produto, e facelo de xeito que os fluxos de traballos estén perfectamente optimizados.
As principais novidades de Google Workspace resúmense en catro:
- Previsualización de enlaces. Ao estar traballando en documentos poderemos acceder a contidos enlazados (por exemplo outro documento) sen abandonar o primeiro a través dun pequeno pop-up.
- Chips intelixentes: ao traballar nun arquivo, se mencionamos a alguén abrirase un pop-up con información contextual que nos permite levar a cabo accións, como compartir o documento.
- PiP en Google Meet. Ao estar traballando en Docs, Sheets e Slides, podemos activar unha chamada de Meet coas persoas colaboradoras dos mesmos, que se activará coma un pop-up sobre o documento, de maneira que se axiliza o traballo compartido no mesmo.
- Creación de documentos en salas. É a única das novidades que non está dispoñíbel neste momento, pero que chegará nas próximas semanas. Isto permite crear documentos compartidos desde unha sala de Chats.
Google Workspace tamén inclúe outras novidades máis transparentes, que teñen que ver coa seguridade, o cal resulta atractivo para grandes compañías.
Plans de prezos
O lanzamento de Google Workspace tamén chega con novidades nos plans de prezos para pequenas e grandes empresas. Para as que teñen menos de 300 empregadas / usuarias son os seguintes:
- Business Starter. Custa 5,20 €/mes por usuaria, incluíndo correo personalizadoe 30 GB de capacidade, e vídeo con até 100 participantes.
- Business Standar. Cun prezo mensual de 10,40 € / usuaria, inclúe 2 TB de capacidade, 150 usuarias por videochamada e posibilidade de gravación.
- Business Plus. É o máis completo, custa 15,60 €/mes, leva 5 TB de almacenamento por usuaria, videochamadas de até 250 usuarias e gravación e vídeo, así como acceso a ferramentas como Vault ou MDM.
Existe unha versión Enterprise, destinada a entidades maiores, mais o seu prezo estúdase para cada caso a través do departamento de vendas de Google.
Máis información | Google Workspace
