Tras varios meses consecutivos perdendo clientes, Simyo vén de reaccionar anunciando novas tarifas de móbil, que estarán dispoñíbeis tanto para as actuais como as novas clientas a partir do próximo 31 de maio. Deste modo, a marca de baixo custe de Orange simplifica a súa oferta e a fai máis atractiva, aumentando significativamente a franquía de gigas que ofrece.
Os plans que se actualizan son os que teñen chamadas ilimitadas, que se resumen nestas catro propostas:
- Ilimitadas + 12 GB por 7,50 €/mes (até o de agora 7 GB).
- Ilimitadas + 20 GB por 10 €/mes (até o de agora 14 GB).
- Ilimitadas + 40 GB por 14 €/mes (até o de agora 25 GB)
- Ilimitadas + 100 GB por 20 €/mes (até o de agora 35 GB).
Todas estas tarifas son compatíbeis co servizo de acumulación de gigas non consumidos, de maneira que aqueles datos non consumidos poderán usarse até tres meses consecutivos.