PcComponentes vén de anunciar o seu novo plan de Gaming as a Service, un servizo de renting que permite ás usuarias desfrutar dos equipos máis potentes, e que está especialmente pensado para as e os entusiastas dos videoxogos. O novo servizo non só inclúe hardware, senón que tamén se ve reforzado con 9 xogos, ademais de acceso a PC Game Pass durante 4 meses e un seguro de dano accidental e roubo.
O servizo ofrece diversos plans para adaptarse ás necesidades de cada cliente, partindo de 30,59 €/mes durante 36 meses. A cota verase incrementada se se escollen equipos máis potentes, ao tempo que tamén varía se optamos por outros períodos, que poden ser de 12 ou 24 meses. Ao finalizar o prazo contratado, pódese extender o tempo de uso, reemprazar o produto por outro máis actual ou devolvelo.
PcComponentes garante que os equipos deste plan empregan Windows 11 como sistema operativo, así como o acceso de balde durante 4 meses a PC Game Pass, o servizo de videoxogos por subscrición de Microsoft, formado por un catálogo de centos de títulos.
Ademais tamén inclúe 9 videoxogos valorados en 200 euros, que estarán dispoñíbeis de forma gratuíta mesmo se se opta por reemprazar o equipo de renting por outro máis actual. Estes xogos son “Halo Wars: Definitive Edition”, “Gears 5”, “Gears Tactics”, “Minecraft Dungeons: Flames of the Nether”, “Age of Empires: Definitive Edition”, “Gears of Wars 4 Standar”, “Recore: Definitive Edition”, “Gears 5: Hivebusters” e “Minecraft: Java & Bedrock Edition”.
Servizos PcComponentes
Como parte do servizo que ofrece PcComponentes, as persoas que contraten algúns destes plan beneficiaranse de envíos rápidos, configuracións recomendadas por expertos e asesoramento. Entre estes servizos están Game Ready Setup (un apoio especializado para a posta en marcha do novo equipo); Overclocking Master (unha maximización de rendemento do hardware para asegurar o mellor funcionamento en escenarios exixentes) e Backup Master, que ofrece axuda para facer copias de seguridade dos datos gardados no equipo.
Máis información | PcComponentes
