Huawei ten novo smartphone encartábel. O Nova Flip está deseñado para aquelas persoas que buscan os últimos avances tecnolóxicos sen sacrificar o estilo. Cun deseño encartábel e características de última xeración, este dispositivo promete unha experiencia única e versátil.
O novo Huawei Nova Flip destaca polo seu deseño encartábel, que ofrece o mellor de ambos mundos: unha pantalla principal de gran tamaño e unha pantalla externa compacta. A principal é un panel OLED de 6,95 polgadas, con resolución Full HD+ e unha taxa de refresco de 120 Hz. A externa, un panel OLED que medra de tamaño (aínda quedando lonxe do que están a ofrecer outros fabricantes) até as 2,14 polgadas (480 x 480), axeitada para poder acceder rapidamene ás notificacións.
Está equipado co procesador Kirin 8000, que garante un rendemento excepcional para todas as tarefas do día a día. E xunto a el, 12 GB de RAM e opcións de almacenaxe de 256 GB, 512 GB e até 1 TB, que aseguran espazo máis que abondo para todos os arquivos, fotos e aplicacións.
No apartado das cámaras temos unha frontal de 32 MP e f/2.2, para autorretratos e videochamadas con claridade. E na parte traseira atopamos unha configuración de dobre cámara, a principal de 50 MP (f/1.9) e unha ultra gran angular de 8 MP (f/2.2).
A batería de 4.400 mAh asegura unha autonomía para completar o día sen problemas. Ademais, está equipada con carga rápida de 66W para recuperar a súa capacidade en pouco tempo.
Como sistema operativo, o Huawei Nova Flip está equipado con HarmonyOS 4.2. E no apartado da conectividade temos 5G, WiFi ax, Bluetooth 5.2 e USB-C. Ademais, inclúe un lector de pegadas dixitais no lateral para un acceso seguro.
Dispoñibilidade e prezo
O novo Huawei Nova Flip está dispoñíbel na China a partir duns 650 € ao cambio. Supón unha moi boa relación calidade prezo para un dispositivo da súa categoría, que combina deseño, rendemento e tecnoloxía vangardista.
Pódese mercar en verde, negro, rosa e branco, aínda que de momento non hai información sobre a súa posíbel comercialización no noso país.
