Veñen de filtrarse as primeiras imaxes do Samsung Galaxy F05. Trátase dun dos modelos de entrada cos que Samsung seguirá a ampliar o seu catálogo neste 2024. Un dispositivo que, tal e como se pode apreciar nas fotografías, estará acabado en coiro vegano, para ofrecer unha sensación máis premium no agarre.
Do seu deseño podemos destacar a liña continuísta na parte frontal, onde teremos unha pantalla Infinity-U, onde se integra a cámara para autoretratos. Na parte posterior, dous sensores de cámara e o flash LED. A botoneira sitúase no lateral dereito, polo que imaxinamos que no lado contrario atoparemos a bandexa extraíbel para a tarxeta SIM.
En canto ás súas especificacións técnicas, semella confirmado que a pantalla será un panel HD de 6,7 polgadas. Tamén que a cámara principal estará formada pola combinación dun sensor de 13 MP cun secundario de 2 MP, e que terá 5.000 mAh de batería e conectividade 4G e WiFi 5.
Falta por saber que procesador terá, que podería ser un modelo básico de Qualcomm ou optar por unha alternativa de MediaTek, fabricante que Samsung foi introducindo nos últimos anos en algún dos seus modelos máis asequíbeis.
