Samsung vén de presentar o Galaxy Book5 Pro 360, o primeiro modelo dunha nova serie de portátiles que destacan polo seu uso avanzado da intelixencia artificial (IA). Este dispositivo, potenciado polo procesador Intel Core Ultra Series 2, chega para engrosar a lista de dispositivos Copilot+ PC que Microsoft está a potenciar xunto varios fabricantes.
O novo portátil de Samsung promete transformar a experiencia informática grazas a unha combinación de alto rendemento e funcionalidades IA integradas, coas que mellora significativamente a produtividade e a creatividade das usuarias.
Principais características do Samsung Galaxy Book 5 Pro 360
Un dos puntos máis destacados do Galaxy Book5 Pro 360 é a súa capacidade de ofrecer un rendemento informático de alto nivel. O procesador Intel Core Ultra Series 2, que multiplica por catro a potencia da unidade de procesamento neuronal (NPU) en comparación co seu predecesor, permite manexar tarefas complexas e soportar máis de 300 aplicacións de terceiros deseñadas especificamente para optimizar as experiencias de IA. Ademais, a súa GPU Intel ARC incrementa o rendemento gráfico nun 18%, o que o convirte nunha opción axeitada para profesionais que requiren potencia gráfica adicional.
O Galaxy Book5 Pro 360 tamén destaca pola súa pantalla de 16 polgadas Dynamic AMOLED 2X con Vision Booster, que mellora a visibilidade en exteriores e reduce os reflexos, ofrecendo unha experiencia visual de calidade grazas á súa resolución 3K e unha frecuencia de actualización adaptativa de 120 Hz. Estas características fan que o uso do dispositivo sexa cómodo e eficiente tanto para traballo como para lecer.
Outro dos grandes atractivos deste portátil é a súa integración co ecosistema de IA de Galaxy. Grazas á función Link to Windows, as usuarios poden conectar o seu dispositivo móbil cunha pantalla máis grande, facilitando o uso de funcións avanzadas como o Circle to Search con Google, Chat Assist, Live Translate, e moito máis. Esta conectividade mellorada permite ás usuarias aproveitar ao máximo as capacidades de IA en diferentes contextos, mellorando a produtividade diaria.
En termos de deseño, o Galaxy Book5 Pro 360 mantén a estética premium de Samsung, incorporando materiais reciclados e un corpo delgado e lixeiro dispoñíbel en cores como gris e prata. Este enfoque sostíbel tamén asegura un dispositivo elegante e funcional, perfecto para as usuarias que buscan un portátil sofisticado e respectuoso co planeta.
En canto á seguridade, o Galaxy Book5 Pro 360 está respaldado por Samsung Knox, a plataforma de seguridade multicapa de Samsung, e as proteccións avanzadas de Microsoft Secured-core, que garanten a protección dos datos persoais mediante a detección de ameazas en tempo real.
Dispoñibilidade e prezo do Samsung Galaxy Book5 Pro 360
A dispoñibilidade do Galaxy Book5 Pro 360 está confirmada para mercados seleccionados como Canadá, Francia, Alemaña, Reino Unido e Estados Unidos a partir do 24 de setembro de 2024.
Con todo, aínda non se anunciou a súa dispoñibilidade para o noso país, polo que teremos que agardar para saber cando poderemos desfrutar deste novo dispositivo de Samsung.
