A existencia do Samsung Galaxy S24 FE (Fan Edition) non causa sorpresa algunha. Nos últimos anos o fabricante surcoreano anunciou cada outono unha versión FE da súa serie referencial, e este 2024 non vai ser a excepción. o Galaxy S24 SE non só existe, senón que ademais estaría próximo a presentarse, á vista das últimas filtracións e de que vén de pasar pola certificación FCC (Comisión Federal de Comunicacións) dos Estados Unidos.
Como vén sendo habitual, o Galaxy S24 FE caracterizarase por ofrecer prestacións premium, inspiradas no Galaxy S24, pero a un prezo máis accesíbel. A información revelada pola FCC adianta cuestións relacionadas coa conectividade, como o equipamento Wi-Fi 6E, NFC, LTE ou o Bluetooth, ademais de indicar que ofrecerá carga sen fíos e inversa de ata 9 W, o que amplía as súas posibilidades en canto a usabilidade diaria.
Por outra banda temos unha imaxe de prensa filtrada, que sen ser de gran calidade permítenos ver que este novo modelo manterá o deseño plano que caracterizou os últimos dispositivos de Samsung. Tamñen que chegará en cando menos cinco cores, incluíndo un amarelo, prateado, negro, verde a azul.
En canto á pantalla, o dispositivo contará cun panel AMOLED de 6,7 polgadas con resolución FHD+ e unha taxa de refresco de 120 Hz, asegurando unha experiencia visual fluída e de alta calidade. No seu interior, integrará o chip Exynos 2400 con GPU Samsung Xclipse 940, acompañado de 8 GB de RAM, proporcionando potencia suficiente para as tarefas máis esixentes e unha batería de 4.565 mAh que garante unha boa autonomía.
O Galaxy S24 FE tamén destacará polo seu sistema de cámaras. A cámara principal de 50 MP, acompañada dun teleobxectivo de 8 MP con zoom óptico 3x e un lente ultra gran angular de 12 MP. A cámara frontal de 10 MP está deseñada para ofrecer autorretratos nítidos e videoconferencias claras, complementando así un conxunto fotográfico moi completo para un dispositivo nesta categoría de prezo.
Con todas estas características, o Galaxy S24 FE parece destinado a seguir o éxito dos seus predecesores, ofrecendo un equilibrio entre rendemento, deseño e prezo. Samsung continúa así súa estratexia de democratizar o acceso á tecnoloxía de alta gama, facendo que as súas innovacións sexan máis accesibles para un público máis amplo.
