PLD Space, a empresa española pioneira no sector aeroespacial, presentou o seu ambicioso plan estratéxico para converterse nun referente global no acceso ao espazo. Durante o evento Beyond_, a compañía desvelou a súa nova familia de lanzadores reutilizábeis MIURA Next e a primeira cápsula tripulada desenvolvida por unha empresa privada en Europa, denominada LINCE.
MIURA 5, MIURA Next e LINCE
Un ano despois do exitoso voo de MIURA 1, PLD Space detallou os avances no desenvolvemento do MIURA 5, un lanzador espacial que se atopa nas últimas fases de fabricación. O lanzamento do MIURA 5 está previsto para finais de 2025. Este lanzador reflicte o compromiso da empresa coa innovación tecnolóxica e a reutilización de foguetes.
Pero o futuro non remata aí. MIURA Next, a nova xeración de lanzadores reutilizábeis, inclúe as versións MIURA Next Heavy e Next Super Heavy, capaces de colocar até 53 toneladas en órbita. Prevese que o primeiro voo desta nova familia sexa en 2030, achegando tecnoloxía de vangarda para realizar misións á Lúa e a Marte.
Outro dos anuncios destacados foi LINCE, unha cápsula tripulada que marca un fito no ámbito aeroespacial europeo. Con capacidade de 8 metros cúbicos, LINCE permitirá a Europa competir en misións tripuladas ao espazo, transportando astronautas e traéndoos de volta á Terra. O primeiro voo de proba sen tripulación está programado para 2028, cun voo orbital previsto para 2030.
Nova planta de innovación en Elx e programa SPARK
PLD Space tamén puxo o foco na sostibilidade, anunciando a apertura dunha nova planta de produción de 12.500 m² en Elx. Esta planta permitirá a fabricación de até seis lanzadores MIURA 5 ao ano, empregando procesos industriais avanzados e técnicas de produción automatizadas.
Ademais, como parte do compromiso coa innovación e a educación, PLD Space lanzou o programa SPARK, unha iniciativa que ofrece servizos de lanzamento gratuítos para proxectos científicos e tecnolóxicos de estudantado e centros de investigación. A astronauta española Sara García-Alonso presentou este programa, que busca inspirar ás novas xeracións a soñar con grandes proxectos espaciais.
Aposta polo liderado global
Con MIURA Next e LINCE, PLD Space refórzase como líder no acceso sostíbel ao espazo, ampliando as fronteiras da exploración espacial. A súa combinación de tecnoloxía avanzada e compromiso coa reutilización coloca á empresa nunha posición privilexiada para liderar o futuro da industria aeroespacial.
