A chegada do WiFi 7 promete revolucionar o mundo da conectividade, e as empresas están entre as máis beneficiadas. Grazas á súa velocidade e estabilidade, esta nova tecnoloxía facilitará que as organizacións melloren a súa eficiencia e produtividade, aproveitando ao máximo os seus recursos de conectividade.
Así o considera MediaTek, unha das empresas líderes na creación de procesadores. Segundo apuntan, a WiFi 7 permitirá ás empresas optimizar os seus procesos, reducindo custes e mellorando o rendemento operativo. Non en van, esta tecnoloxía permite conexións até seis veces máis rápidas ca o seu predecesor, WiFi 6E.
A WiFi Alliance (a organización sen ánimo de lucro formada por máis de 800 empresas tecnolóxicas que se encarga de certificar e establecer os estándares globais para a WiFi) agarda que a finais deste 2024 haxa máis de 233 millóns de dispositivios conectados a WiFi 7 en todo o mundo. Unha cifra que irá incrementándose conforme vaian actualizándose os dispositivos.
Beneficios da WiFi para empresas
Desde MediaTek destacan tres beneficios principais da WiFi 7 para o mundo empresarial:
- Seguridade avanzada: coa axuda da Intelixencia Artificial (IA), as ameazas da rede poden ser detectadas de maneira máis eficaz, protexendo mellor os datos sensíbeis.
- Rendemento óptimo: a WiFi 7 permite conexións moito máis rápidas, co que combinado coas capacidades de IA mellorará a fluidez da navegación e reducirá a latencia.
- Conectividade intelixente: A IA permitirá dar prioridadede ancho de banda a dispositivos que o requiran segundo o seu uso, mellorando a experiencia de usuario en todo o momento.
Para as empresas, esta combinación de alta velocidade, seguridade mellorada e optimización do rendemento será crucial para seguir sendo competitivas nun mundo cada vez máis dixitalizado.
