Telefónica e Vodafone están a piques de dar un importante paso para revolucionar o sector das telecomunicacións no Estado español coa creación dunha nova empresa conxunta de fibra óptica. Tras meses de negociacións, as dúas operadoras están preto de asinar o acordo vinculante, o que supón un avance determinante no proxecto FibreCo, destinado a ofrecer servizos de fibra óptica en todo o territorio nacional.
O primeiro paso para este acordo tivo lugar o 30 de xullo, cando Telefónica e Vodafone anunciaron un acordo inicial non vinculante. Desde entón, ambas compañías traballan arreo para estruturar esta nova entidade, que terá o apoio financeiro de bancos como Barclays e BBVA, asesores principais de Vodafone e Telefónica respectivamente. A implicación destas entidades mostra o compromiso das operadoras por facer desta colaboración un éxito.
A creación desta nova empresa de fibra óptica esixe un terceiro socio financeiro. Este socio achegaría capital á entidade, co obxectivo de facer a empresa sustentábel a longo prazo. Espérase que o acordo vinculante estea listo en cuestión de días, e que neste mesmo mes de novembro se publique un documento para atraer posíbeis investidores. Segundo as últimas estimacións, esta nova empresa estaría valorada entre 2.000 e 2.500 millóns de euros e cubriría arredor de 3,5 millóns de fogares cunha infraestrutura FTTH (fibra ata o fogar) proporcionada por Telefónica e Vodafone.
Fontes do sector apuntan a que esta colaboración entre Telefónica e Vodafone achegará beneficios significativos, tanto a nivel de infraestruturas como no mercado de telecomunicacións español. A nova empresa disporá dunha carteira de 1,4 millóns de clientes iniciais, xerando ingresos inmediatos e consolidando o proxecto. Movistar terá unha participación do 50%, Vodafone un 10%, e o 40% restante corresponderá ao novo socio financeiro. Este esquema permitirá a ambas empresas obter liquidez, esencial para afrontar novos investimentos e reducir débedas, especialmente no caso de Vodafone tras a operación de compra por parte de Zegona.
Co avance deste proxecto, Telefónica e Vodafone sentan as bases para un futuro onde a fibra óptica será máis accesíbel para as usuarias en diferentes rexións. A nova FibreCo promete expandir a conectividade a moitos fogares, impulsando a adopción de tecnoloxías avanzadas e mellorando a calidade do servizo.
