O sector tecnolóxico en Galiza continúa a medrar a bo ritmo. Segundo os datos que vén de presentar o Clúster TIC Galiza, existen máis de 500 vacantes dispoñíbeis nas empresas asociadas, o dobre ca no 2023. Este aumento evidencia a elevada demanda de profesionais especializados, impulsada polo crecemento do emprego tecnolóxico, que experimentou un incremento do 18,5% nos últimos tres anos.
Os perfís máis solicitados están relacionados co desenvolvemento de software, que representan o 58% das ofertas, seguidos por persoas expertas en sistemas (23%) e analistas ou xestoras de proxectos (19%). A maioría destas posicións (80%) están dirixidas a perfís sénior con experiencia, mentres que o 20% restante ofrece oportunidades para profesionais en inicio de carreira.
Este crecemento non se limita ao número de vacantes. Entre 2020 e 2023, o sector xerou preto de 3.600 novos empregos, acadando preto de 23.000 traballadoras en Galiza. Ademais, o número de empresas tecnolóxicas aumentou nun 6% no mesmo período, consolidando un ecosistema que demanda talento de forma constante.
Aposta pola formación e futuro prometedor
Para afrontar esta demanda crecente, o Clúster TIC Galiza está a apostar por iniciativas e programas como o Campus Dual TIC ou colaboracións pioneiras con centros educativos, como o IES Fernando Wirtz Suárez, que buscan formar aos perfís dixitais que o mercado require. Ademais, entre 2022 e 2024, máis de 8.000 alumnas e alumnos participaron en cursos especializados deseñados para potenciar as súas habilidades e adaptalas ás necesidades reais das empresas.
O panorama semella claro. O sector TIC galego segue a ser un motor de emprego e innovación. Cunhas cifras que amosan crecemento e múltiples iniciativas para captar talento, o futuro da tecnoloxía en Galiza semella prometedor.
