ABANCA vén de converterse no primeiro banco en implementar a intelixencia artificial xerativa (IAX) para atender consultas da súa clientela (e posíbeis futuras clientas). Este novo servizo, bautizado como SOFia, está dispoñíbel nunha versión inicial para un grupo reducido de usuarias, coa previsión de que sexa implantado para o conxunto da súa clientela no mes de decembro, a través da páxina web da entidade.
SOFia representa un avance na atención ao cliente, ofrecendo respostas inmediatas e adaptadas a preguntas formuladas en linguaxe natural. Este asistente virtual baséase na información dispoñíbel na web de ABANCA, o que lle permite responder con precisión sobre produtos, servizos ou cuestións comúns. Ademais, as usuarias que necesiten ampliar información serán redirixidos a espazos específicos da web para continuar a súa xestión con seguridade.
A intelixencia artificial xerativa fai posíbel que SOFia entenda o contexto e o significado das preguntas, xerando respostas personalizadas e non predefinidas. O servizo está dispoñíbel as 24 horas, en varios idiomas, e actualízase constantemente grazas á integración de contidos novos e renovados.
Durante as probas previas ao lanzamento, SOFia obtivo unha valoración media de 4,23 sobre 5 por parte das usuarias participantes. Máis do 50% puntuaron o servizo coa nota máxima, destacando a súa utilidade, coherencia, o uso dunha linguaxe próxima e a facilidade de uso.
Aposta estratéxica de ABANCA pola IA
No que vai de 2024, a entidade implantou máis de 25 iniciativas baseadas en intelixencia artificial xerativa, alcanzando unha transformación significativa no banco.
Segundo destacan desde ABANCA, o 60% do equipo profesional emprega ferramentas de IA no seu traballo habitual e o 32% dos procesos principais do banco incorporan tecnoloxía de intelixencia artificial. Unhas integracións de IA coas que aseguran ter mellorado a súa produtividade nun 35%.
