LG Gram AI: portátiles máis intelixentes e lixeiros para 2025

A gama de portátiles LG Gram renóvase para 2025 cunha integración total da intelixencia artificial (IA), tanto no dispositivo como na nube. Presentados no CES 2025, que inicia o calendario de citas tecnolóxicas deste 2025, os novos modelos LG Gram Pro, Pro 2 en 1, Gram e Gram Book buscan revolucionar o mercado combinando rendemento avanzado, máxima lixeireza e funcionalidades intelixentes.

Innovación en IA para unha experiencia personalizada e segura

Os novos portátiles LG Gram AI inclúen a tecnoloxía Copilot+ de Microsoft e gram chat Cloud, baseada en GPT-4o, que ofrecen funcionalidades adaptadas ás necesidades das usuarias. Esta solución híbrida de IA procesa datos localmente, garantindo privacidade e velocidade, e complementa esta capacidade coa análise e exploración de datos a gran escala grazas á nube.

• Gram chat On-Device: Usa algoritmos de IA locais, derivados de EXAONE de LG AI Research, para realizar tarefas como a función Time Travel, que permite navegar rapidamente por documentos, webs e vídeos.
• Gram chat Cloud: Accede a datos en liña, organiza o calendario persoal e xestiona o correo electrónico de forma eficiente.

Estas innovacións fan dos novos LG Gram unha opción axeitada tanto para necesidades profesionais como para outro tipo de usuarias, que poden ver mellorada a súa produtividade ao adaptarse continuamente ás súas necesidades.

Procesadores Intel Core Ultra H e Ultra V

Os portátiles LG Gram inclúen os novos procesadores Intel Core Ultra H (Arrow Lake) e Ultra V (Lunar Lake). Estas CPUs melloran o rendemento e integran funcionalidades específicas de IA: o primeiro destaca pola súa maior capacidade gráfica e de cálculo (ideal para tarefas esixentes, como renderizados 3D ou edición de vídeo). E o segundo por incluír Copilot+, con ferramentas como tradución de subtítulos en tempo real ou xeración de imaxes mediante IA.

O modelo Gram Pro 17Z90TR, por exemplo, combina unha CPU Arrow Lake cunha gráfica NVIDIA RTX 4050, ofrecendo potencia de sobra para deseño e tarefas creativas.

Deseño e versatilidae para o día a día

A gama LG Gram continúa destacando pola súa lixeireza e portabilidade. Cada modelo está deseñado para un público específico, sen comprometer a funcionalidade:

• Gram Pro 16Z90TS: Con só 1,24 kg de peso, é o portátil máis fino da serie, perfecto para o traballo diario.
• Gram Pro 2 en 1 16T90TP: Inclúe un lápis óptico recargábel, ideal para creativas e profesionais do deseño.
• Gram Book 15U50T: O modelo de entrada, cunha pantalla Full HD e opcións de almacenamento ampliables, é perfecto para estudantes ou usuarios básicos.

Todos os portátiles son compatíbeis con Gram Link 2.0, que permite compartir contidos entre dispositivos con diferentes sistemas operativos e realizar chamadas desde o portátil, mellorando a conectividade.

Un futuro máis conectado con LG Gram

Os novos portátiles LG Gram non só destacan polo seu rendemento e deseño, senón tamén polo seu compromiso coa innovación tecnolóxica. A integración da IA, xunto coa conectividade avanzada e a colaboración con Microsoft e Intel, sitúan a LG Gram como unha das referencias no mercado dos portátiles.

Con estas novidades, LG reafirma a súa posición nos dispositivos lixeiros e de alto rendemento, garantindo que as usuarias dispoñan das ferramentas necesarias para triunfar nun mundo cada vez máis dixitalizado.

Modelos e especificacións