A Xunta de Galiza, a través da Axencia Galega de Emerxencias (Axega), comezou a testar un innovador sistema de retransmisión e xestión de vídeo en tempo real. O proxecto piloto combina o uso de drons cautivos, sensores instalados en vehículos de intervención e unha plataforma centralizada que permitirá supervisar as imaxes captadas. O obxectivo principal é avaliar a eficacia desta tecnoloxía para mellorar a prevención de riscos e a capacidade de resposta en emerxencias.
O proxecto inclúe un drón cautivo equipado con cámaras de alta resolución, deseñadas para operar mesmo en condicións meteorolóxicas adversas. Este dispositivo, conectado a unha base fixa, poderá manterse operativo de maneira ininterrompida a máis de cen metros de altura, garantindo unha visión ampla e detallada do terreo. Ademais, o drón é compatíbel cos dispositivos actuais da Axega, reforzando a súa capacidade operativa en diferentes contextos.
Sensores en vehículos de intervención e xestión centralizada
Para complementar a visión aérea, instalaranse sensores e sistemas de retransmisión en catro vehículos de primeira intervención dos parques de bombeiros de O Porriño, a mancomunidade de Celanova e Valença do Minho, e o GES de Ponteareas. Cada camión estará equipado con dúas cámaras exteriores de alta definición e sistemas internos que permiten a transmisión en tempo real, facilitando unha visión detallada do entorno durante as intervencións.
As imaxes captadas por drons e vehículos serán procesadas e almacenadas nunha plataforma centralizada. Esta ferramenta avanzada permitirá a xestión remota das cámaras, a gravación en tempo real e o almacenamento seguro de contido multimedia durante períodos prolongados.
Financiamento europeo ao abeiro do programa ATEMPO
Este proxecto piloto enmárcase no programa ATEMPO (Asistencia Transfronteiriza de Emerxencias), cofinanciado pola Unión Europea a través do programa Interreg España-Portugal. A iniciativa busca avaliar a viabilidade técnica e práctica do sistema e explorar as súas posíbeis aplicacións na detección de incidentes, a vixilancia de riscos e a toma de decisións en situacións críticas.
