ASUS segue ampliando a súa oferta de móbiles gaming coa chegada do ROG Phone 9 FE, unha versión máis accesíbel do seu buque insignia que xa se lanzou en Tailandia. Este modelo herda moitas das características do ROG Phone 8, pero mantén un rendemento de alto nivel cun Snapdragon 8 Gen 3 e o sistema de iluminación AniMe Vision na parte traseira.
Deseño e pantalla de alto rendemento
O ROG Phone 9 FE segue a mesma liña de deseño dos dispositivos gaming de ASUS, cunha pantalla OLED de 6,78 polgadas que acada os 185 Hz de refresco. Ademais, ofrece unha luminosidade máxima de 2.500 nits, garantindo unha experiencia visual inmersiva e fluída, ideal para as xogadoras máis esixentes.
Na parte traseira, destaca a iluminación AniMe Vision con 341 LEDs, que permite personalizar efectos visuais, e os AirTrigger keys, uns botóns programábeis que melloran a experiencia en xogos competitivos. O dispositivo tamén conta con certificación IP68, o que lle proporciona resistencia á auga e ao po.
Potencia e autonomía equilibradas
ASUS decidiu apostar polo Snapdragon 8 Gen 3, en lugar do máis recente Snapdragon 8 Elite, pero este procesador segue sendo un dos máis potentes do mercado. Ademais, está optimizado co GameCool Cooling System, que axuda a manter as temperaturas controladas durante as sesións de xogo máis intensas.
En canto á autonomía, inclúe unha batería de 5.500 mAh, lixeiramente inferior á dos modelos principais da serie ROG Phone 9, pero que segue garantindo unha excelente duración. Acompáñase de carga rápida de 65W por cable e 15W de carga sen fíos, permitindo recuperar enerxía en pouco tempo.
Cámaras melloradas e funcións extra
A nivel fotográfico, o ROG Phone 9 FE incorpora unha configuración moi similar á do ROG Phone 9 estándar:
- Cámara principal de 50 MP (IMX890) con estabilización gimbal, garantindo imaxes nítidas e vídeos estabilizados.
- Lente ultra gran angular de 13 MP con tecnoloxía de lente libre, que reduce distorsións.
- Sensor macro de 5 MP.
- Cámara frontal de 32 MP con filtro RGBW, mellorando as fotografías en condicións de baixa luz.
Outras características a destacar inclúen Wi-Fi 7, Bluetooth 5.4, Android 15 con ROG UI e varias funcións de IA como transcrición de chamadas e tradución en tempo real.
Prezo e dispoñibilidade do ROG Phone 9 FE
O ROG Phone 9 FE xa está dispoñíbel en Tailandia por uns 850 euros (29.990 baht) na súa versión de 16 GB de RAM e 256 GB de almacenamento. Polo de agora, ASUS non confirmou se o lanzamento será global, pero estaremos atentas ás próximas novidades. Se chega a Europa e EE.UU., haberá que ver como se posiciona fronte ao ROG Phone 9 estándar, que custa 1099 €.
