O mercado dos teléfonos encartábeis segue avanzando a un ritmo vertixinoso e Samsung quere manter a súa posición de líder. A filtración do deseño do Samsung Galaxy Z Fold7, compartida por Android Headlines, confirma que a compañía surcoreana apostará por un terminal máis delgado ca nunca, reducindo significativamente o seu grosor fronte á xeración anterior.
Samsung segue os pasos de Oppo na carreira pola delgadez
Nos últimos días, vimos como o Oppo Find N5 se convertía no móbil encartábel máis fino do mundo. Samsung parece querer responder con este novo Galaxy Z Fold7, que, segundo as filtracións, terá un grosor de só 4,5 mm cando está despregado e 9,5 mm cando está pechado, incluíndo o módulo de cámaras traseiro.
Se estas cifras se confirman, significaría unha redución de 2,5 mm en comparación co Galaxy Z Fold6, que contaba cun grosor de 12,1 mm estando pechado. Este sería un cambio notábel en termos de deseño e ergonomía, facendo que o novo dispositivo de Samsung sexa máis cómodo de soster e transportar.
Pantalla máis grande e procesador de última xeración
As filtracións apuntan a que o novo Samsung Galaxy Z Fold7 non só destacará polo seu deseño, senón tamén polas súas pantallas renovadas. Segundo estes datos, contará cunha pantalla interna de 8,2 polgadas e unha externa de 6,5 polgadas.
No apartado de rendemento, o dispositivo apostará polo Snapdragon 8 Elite for Galaxy, o mesmo procesador que estrearon os Galaxy S25. Esta elección asegura un rendemento superior en multitarefa e xogos, ademais de optimizacións no consumo enerxético.
Samsung podería dar un salto substancial na fotografía, incluíndo un sensor principal de 200 megapíxeles. Esta mellora permitiría capturar imaxes máis nítidas e detalladas, mantendo ademais un ultra gran angular e un teleobxectivo similares aos do modelo anterior. En canto á cámara frontal, contaríamos cunha dobre configuración de 10 MP e 4 MP, esta última integrada baixo a pantalla interna.
A batería semella manterse en 4.400 mAh, igual que no Galaxy Z Fold6, pero espérase unha mellora na optimización enerxética para conseguir unha maior autonomía.
Lanzamento do Samsung Galaxy Z Fold7: que sabemos até o de agora?
Aínda que non hai unha data oficial confirmada, todo apunta a que Samsung presentará o Galaxy Z Fold7 e o Galaxy Z Flip7 entre xuño e xullo de 2025. A compañía segue apostando forte por este tipo de dispositivos encartábeis, e este modelo podería converterse no máis avanzado e refinado até o de agora.
Agora só queda esperar a súa presentación oficial para coñecer todos os detalles.
