O sector da robótica e a intelixencia artificial están a vivir un momento de gran expansión, e Google DeepMind acaba de dar un paso adiante coa presentación de Gemini Robotics. Esta nova xeración de modelos de IA, baseada en Gemini 2.0, busca levar a intelixencia artificial máis aló do mundo dixital e facer que os robots poidan comprender, interactuar e actuar no mundo físico de forma eficaz e autónoma.
Unha IA deseñada para o mundo real
Até o de agora, os modelos de intelixencia artificial centrábanse principalmente en procesar texto, imaxes, audio e vídeo dentro do mundo dixital. Pero para que a IA sexa realmente útil en contornas físicas, necesita ter razonamento encarnado (embodied reasoning), é dicir, a capacidade de comprender e reaccionar ao que ocorre no mundo real.
Con este obxectivo, Google DeepMind presentou dous novos modelos: Gemini Robotics, un modelo avanzado que combina visión, linguaxe e acción, permitindo o control directo de robots en tempo real; e Gemini Robotics-ER, unha versión con capacidades melloradas de comprensión espacial para que as enxeñeiras poidan programar os seus propios sistemas robóticos con Gemini.
Ambos modelos abren a porta a unha nova xeración de robots máis versátiles e autónomos, capaces de realizar tarefas no mundo real con precisión e seguridade.
As tres claves de Gemini Robotics: xeneralidade, interactividade e destreza
Segundo apunta Google no seu blog, para que un robot sexa realmente útil, debe ser xeneralista, interactivo e destro. Gemini Robotics destaca nestes tres ámbitos:
- Xeneralidade: O modelo aprende de forma autónoma, adaptándose a novas situacións sen necesidade de adestramento previo. Pode recoñecer obxectos, interpretar instrucións e adaptarse a diferentes contornas sen problemas.
- Interactividade: Grazas á súa base en Gemini 2.0, este modelo pode comprender e responder a ordes en linguaxe natural, en distintos idiomas e con comandos complexos. Ademais, pode detectar cambios no ambiente e modificar as súas accións en tempo real.
- Destreza manual: Un dos grandes desafíos da robótica é a manipulación precisa de obxectos. Gemini Robotics é capaz de realizar tarefas de alta precisión, como dobrar origami ou empaquetar obxectos delicados, grazas á súa capacidade de planificación e execución multi-paso.
Os modelos de Gemini Robotics están deseñados para adaptarse a diferentes tipos de robots, desde brazos robóticos ata humanoides. A súa versatilidade xa está a ser probada en plataformas como:
- ALOHA 2, un sistema bi-brazo avanzado.
- Franka, un dos brazos robóticos máis populares en laboratorios académicos.
- Apollo, o robot humanoide desenvolvido por Apptronik para tarefas complexas no mundo real.
Gemini Robotics-ER: mellorando a comprensión espacial da IA
Xunto con Gemini Robotics, Google DeepMind tamén presentou Gemini Robotics-ER, unha versión optimizada para razonamento espacial.
Este modelo permite recoñecer obxectos en 3D con maior precisión, planificar movementos seguros e eficientes para manipular obxectos e integrarse con sistemas robóticos xa existentes sen necesidade de programar manualmente cada acción.
O futuro da robótica con Gemini 2.0
A chegada de Gemini Robotics marca un punto de inflexión na intelixencia artificial aplicada á robótica. Ao combinar visión, linguaxe e acción nun só modelo, Google DeepMind está a abrir o camiño cara a robots máis autónomos, intelixentes e útiles para o mundo real.
A medida que estes modelos sigan evolucionando, podemos esperar avances significativos en campos como a automatización industrial, a asistencia sanitaria, a loxística e a exploración espacial. O futuro da robótica está aquí, e Gemini Robotics é a proba de que a IA está preparada para saír do mundo dixital e comezar a transformar o mundo físico.
